Samuel oqaloqatigigatsigu Tasiusami Nutaarmiut ungasinngisaani allatulaaq suliaqarpoq. Sunaaffa Finlandimiut marluk Nordjobb aqqutigalugu Tasiusami Royal Greenlandip tunisassiorfianut suliartorsimasut oqaluttaaffigiartorsimagai.

Samuel Nutaarmiuni siorna aasaagaa Nordjobb aqqutigalugu sulisimavoq, ukioq mannalu sungiussilertorpoq.

- Nutaarmiut inuttaalu inussiarneqisut maqaasigakkit Nutaarmiunut uteqqinniarlunga aalajangerpunga. Naak maani internetsimut attaveqanngikkaluartoq uteqqinnera iluaraara. Ila Upernaviup eqqaani pinngortitaq najoqqilerlugu nuanneqaaq, Samuel oqaluttuarpoq.

Samuelip ningiua, Arnannguaq Eskildsen Nutaarmiuni tunisassiorfimmi aqutsisuusoq oqaluttuarpoq, Nordjobb aqqutigalugu arfinilinnik sulisoqarluni.

- Sulisussaleqigatta Nordjobb aqqutigalugu sulisoqarpugut. Soorunami sulilerlaat ilinniarteqqaagassaasarput, kingornali uatsituulli sulisinnaalersarput. Qallunaatut, svenskisut tuluttullu oqaloqatigiinniartarpugut, paaseqatigiissinnaajunnaaraangattalu ussersorluta paaseqatigiittarpugut, Arnannguaq illaatigaluni oqarpoq.

Royal Greenlandi Nordjobb aqqutigalugu ukiuni marlussuni sulisoqareerpoq. Suliffeqarfissuaq Nordjobb aqqutigalugu ukioq manna 37-nik sulisoqarpoq, Maniitsumi aqqanillit, Paamiuni tallimat, Ilulissani arfineq pingasut, Nutaarmiuni arfinillit, Tasiusami pingasut kiisalu Uummannami sisamat.

- Inuusuttunik Nunanit Avannarlernit qinnuteqaateqarsimasunik Kalaallit Nunaanni ilaatigullu aalisakkerivimmi sulillutik misigisassarsiorusuttunik sulisoqarsinnaavugut. Taakkuukkajupput ilinniagallit ilinniaqqinniarlutilluunniit eqqarsaateqartut. Ilaat piorsarsimassutsitigut assigiinngissutsit tuparujussuaatigisarpaat ilaasali nuannarisaqarlugu. Nunani Avannarlerni innuttaassuseqarmata tikisinnissaat uatsinnut ajornaatsuuvoq aammalu nuttartinnissaat uatsinnut iluaqutaaqisoq periarfissaalluni, Royal Greenlandimi suliniutilerinermi ataqatigiissaarisoq aammalu Nordjobb aqqutigalugu ukioq manna sulisussarsiorlunilu ataqatigiissaarisoq Mikkel Krogh Søndergård oqarpoq.

Samuel Macario Nordjobb aqqutigalugu suliartortut Kalaallit Nunaannik nuannarinnittut ilagaat. Tasiusami Nordjobbimeersunik allanik oqaluttaajartornermini tunisassiorfimmi sulivoq. Taamaammallu Nordjobbimeersunut allanut siunnersortitut aamma suliaqarpoq.

Samuel Sverigimeersuusoq ilisimatusarfimmi LifeSciencemi kemi pillugu ilinniaqqammerpoq. Imaani uumasorsiuutut ilinnigaqarnissani eqqarsaatigaa. Maannakkuugallartorli Nordjobb aqqutigalugu misigisassarsiorpoq.

- Kalaallit nerisassaataat aamma mamareqaakka, soorlu aalisakkat puisillu neqaa. Tunisassiorfimmilu sulineq ilungersunaraluartoq Nordjobb aqqutigalugu Kalaallit Nunaanniinnera iluaraara, Samuel Macario oqarpoq.

Allattoq: Káte Hansen, kaha@royalgreenland.com

Asseq: RG Nutaarmiut

Asseq

 
 

Royal Greenland aperiguk

i
Write the text from the image