- Royal Greenlandip tunisassiorfiini sulisussaaleqisarfiusuni ulapaarfimmi sulisussanik sulisussarsiortarnerup oqinnerusumik ingerlanneqartalernissaa anguniarlugu sulisussarsiortarnerup ulapaarfimmilu sulisussat angalanissaannik aaqqissuinerup tungaatigut allaffissornermi suliassat Namminersorlutik Oqartussat akuersineratigut Royal Greenlandimit 2016-imi akisussaaffigineqalerput. Suliassat kommunemit siornatigut ingerlanneqartartut akisussaaffigileratsigilli illoqarfinneersunik nunaqarfinneersunillu sulisussarsiortarneq pilertornerulerpoq. Sulisussarsiortarneq pilertornerulermat ulapaarfimmi sulisussat 23-t, taakkunannga sisamat Tunumi nunaqarfinneersut, angalanissaat sulisoqarnermut immikkoortortami sulisunit ukioq manna aaqqissuunneqarput, Royal Greenlandimi sulisoqarnermi allaffissornermut aqutsisoq Svend Larsen oqarpoq.

Ulapaarfimmi sulisut aqqanillit Kullorsuarmeersut Royal Greenlandip Ikerasammi Ukkusissanilu tunitsiviini ukioq manna sulipput, massa ulapaarfimmi sulisut allat Aasianneersut, Qeqertarsuarmeersut kiisalu nunaqarfinnit allaneersut Royal Greenlandip Qeqertami tunitsiviani sulisut. Ulapaarfimmi sulisut allat, taakkunannga sisamat Tasiilap nunaqarfianeersut, Royal Greenlandip Upernaviup nunaqarfiisa tunitsiviini sulipput.

- Ukioq manna ulapaarfimmi sulisussanik Tunumiit Kommuneqarfik Sermersooq suleqatigalugu suliartortitsivugut. Taakku Royal Greenlandip Upernaviup nunaqarfiisa tunitsiviini arlaliusuni maanna sulipput, Svend Larsen oqarpoq.

Isumaqatigiissusiorneq

Royal Greenlandip tunisassiorfiini tunitsiviinilu ulapaarfimmi sulisussanik sulisussarsiortarneq ukiorpassuanngortuni ingerlanneqalereerpoq. Taamaammat Royal Greenland ulapaarfimmi sulisartut illusisimaffissaannik ukiut ingerlaneranni illusiortortarpoq. Royal Greenlandimi ulapaarfimmi sulisut angalanerat Namminersorlutik Oqartussat nuttartarnermut aningaasaateqarfiannit akilerneqartarput, massa illusisimaffissaqarnissaat Royal Greenlandimit isumagineqartartoq. Ulapaarfimmi sulisut Namminersorlutik Oqartussat nuttartarnermut aningaasaateqarfiat aqqutigalugu isumaqatigiissusioraangata isumaqatigiissut qaammatini arfinilinni atuuttussaq atsiortarpaat.

- Royal Greenland illoqarfinni nunaqarfinnilu sulisussaaleqisarnerit pakkersimaarniarlugit ulapaarfimmi sulisut illusisimaffissaannik ukiut ingerlaneranni illusiortortarpoq. Ulapaarfimmi sulisut najukkaminnut qaammatit arfinillit suli qaangiutinngitut uterusuttut angalanertik namminneq akilertassavaat. Tamatumani malittarisassaq piumasaqaataasoq naapertorneqartussaavoq Namminersorlutik Oqartussat nuttartarnermut aningaasaateqarfiat aqqutigalugu isumaqatigiissusiorsinnaajumagaanni, Svend Larsen oqarpoq.

Svend Larsen oqarpoq, ulapaarfimmi sulisussanik sulisussarsiortarnermut iluarsiissut Royal Greenlandimit ukiorpassuarni iluaqutigineqartoq.

- Sulisussarsiortarnermut iluarsiissut tunisassiornerup ataavartumik ingerlanneqarnissaanik qulakkeerinnittussanik sulisussarsisarnitsinnik kinguneqartitsisarmat iluaqutaavoq.

Kisianni Namminersorlutik Oqartussat nuttartarnermut aningaasaateqarfiat Royal Greenlandip sineriammi tunisassiorfiini tunitsiviinilu ulapaarfimmi sulisuinut taamaallaat tapiissuteqarneq ajorpoq.

- Tunisassiorfiit arlallit nunaqarfinneersunik ulapaarfimmi sulisoqarput. Assersuutigalugu Royal Greenland ulapaarfimmi sulisut nunaqarfinneersut Royal Greenlandip Kangaatsiami tunisassiorfianut suliartorlutik angalanerminnik namminneq akiliisimasut illusisimaffissaannik Kangaatsiami ukioq manna illuseqqippoq, Svend Larsen oqarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image