- Umiatsiaaqqamik Pocamik nutaaliaanerpaanik atortulersukkamik attartorsinnaanera pissutigalugu qaleralittarisartakkakka siornatigumut sanilliullugit minnerpaamik marloriaammik annertunerulersinnaanngortippakka, 24-nik ukiulik Otto Dorph aalisartut pingasut pineqartut ilagisaat Pocamillu 570-imik attartortinneqartoq oqarpoq.

Otto Dorph Pocamik juulip aallaqqaataata nalaani attartorsinnaanngornissami tungaanut inuttaasimavoq.

- Umiatsiaaraatima Vilmasup aquuteralattaa ukioq ataaseq matuma siorna aserormalli inuttaavunga. Taamaammat Pocamik nutaamik ullutsinnullu naleqquttunik atortulersukkamik aalisarsinnaanngornera pissutigalugu namminersorlunga aalisarsinnaanngorlungalu aningaasarsiorsinnaanngornerulerpunga. Naatsorsuutigaara Pocap attartukkama pisiarinissaanut ukioq ataaseq qaangiuppat naafferartumik akilersuisalerumaarlunga. Taamaattumik ilaquttakkalu siunissarissaarpasittussanngorpugut, Otto Dorph katerlaajusoq aamma paneqartoq oqarpoq.

Periarfissat

Aappilattup eqqaa qaleraleqarfissuummat aamma aalisartut pineqartut umiatsiaaqqanik aalisarnermilu atortunik ullutsinnut naleqquttunik atorfissaqartitsimmata Royal Greenland umiatsiaaqqanut pingasunut; Poca 600-nut marlunnut 225-nik hiistilinnik aquuteralalinnut aamma Poca 570-imut ataatsimut 150-inik hiistilimmik aquuteralalimmut aningaasaliivoq.

- Sumiiffiit Aappilattup eqqaani aalisarfiusinnaasut aalisartut umiatsiaaqqatik aalisarnermilu atortutik pisoqalisimaqisut atorlugit aalisarfigisartagaaniit ungasinnerusumiipput. Taamaammat Royal Greenland umiatsiaaqqanut anginernut pitsaasunillu aalisarnermi atortulinnut aamma aalisartunit pingasunit Aappilattumeersunit attartorneqarsinnaasunut aningaasaliinissaminut aalajangerpoq, Royal Greenlandimi tunisassialerinermi ingerlatsisoq Møller Lyberth oqarpoq.

Umiatsiaaqqat Pocat attartortinneqartut aalisartunit pingasunit ukiumik ataatsimik sivisussusilimmik attartorneqassapput, attartoreerunikkit pisiarinissaannut naafferartumik akilersuisalissapput.

Royal Greenlandip Aappilattumi aalisakkanik tunitsivik novembari 2014-imi pisiareriarlugu nutartertillugulu ammaqqippaa. Taamatuttaaq Royal Greenland aalisartut Aappilattup eqqaani aalisaraangamik unnuiffissaqarsinnaaqqullugit 2015-imi illusivoq, massakkullu umiatsiaaqqanik pingasunik nutaaliaanerpaanik pisilluni.

- Qularinngilarput Aappilattup eqqaa qaleraleqarluarmat aalisarfiulluarsinnaasoq. Taamaammat qularinngilarput umiatsiaaqqanut pingasunut aningaasaliineq Royal Greenlandip Aappilattumi tunitsivianut tunisat annertunerulerneranik kinguneqarumaartoq, Møller Lyberth oqarpoq.

Royal Greenlandip Aappilattumi tunitsivia aalisakkanik ullormut unnuamullu 4 tonsinik tunitsivigineqarsinnaavoq, aalisakkallu 70 tonsit qerisuusivianiitinneqarsinnaapput.

Allattoq: Inga Egede, ineg@royalgreenland.com

Asseq: Nikolaj Benjaminsen

Asseq

 
 

Royal Greenland aperiguk

i
Write the text from the image