Ukiumoortumik naatsorsuusiortarneq ukiup aallartinneraniit naanissaata tungaanut ingerlanneqartalertussaammat ukiumoortumik naatsorsuutit qaammatinik 15-inik aallaaveqarput.

7 milliarder koruuninik kaaviiaartitaqarneq 335 millioner koruuninillu akileraannginnermi angusaqarneq qaammatinik amerlanerusunik aallaaveqarmata soorunami eqqaamaneqassaaq –kisianni assersuunneqarfissaanut allanut sanilliukkaanni suliffeqarfissuaq aatsaat taama angusaqarluartigaaq.

Qaammatini aqqaneq-marlunni kaaviiaartitat 5,4 milliarder koruuniummata 14 %-inik qaffapput. Tassa imaappoq, Wilhelmshavenimi tunisassiorfiup tuninnginneranisuulli kaaviiaartitaqartigalunilu suliffeqarfissuup ukiut pingasut matuma siorna tunisaasa 40 %-iisa annertoqataanik tunisaqarpoq.

Qaammatit aqqaneq-marluk tunngavigalugit akileraannginnermi angusat siorna ukiumoortumik naatsorsuutini aatsaat taama pitsaatigisumik angusaqarfiusimasunit 20 millioner koruuninit amerlanerusunit qaffasinnerupput.

Royal Greenlandip iliuusissatut pilersaarut tunngavigalugu ineriartortitsinissami raajat issittup imartaaneersut, qalerallit saattuallu maanna ukkatarilerpai. Quin-Sea Fisheriesimik pisineq Royal Greenlandip Canadami Kalaallit Nunaannilumi tunisassianik Amerikap avannaanut niueruteqartarnerata pitsanngorneranik kinguneqarpoq. Royal Greenlandip Amerika avannarleq Kangia, Skandinavia Europalu assigalugit pingaarnertut niuernermik ingerlatsivigilertussanngorpaa.

- Royal Greenland suliffeqarfinni aalisakkanik Atlantikup Avannaata imartaaneersunik tunisassianik assigiinngiiaartunik aallussaqartuni maanna annerpaanut akuuvoq aammalu raajanik, qaleralinnik nipisallu suaannik niueruteqartartuni siuttuulluni, pisortaaneq Mikael Thinghuus oqarpoq nangillunilu:

- Suliffeqarfiup patajaatsuunera pissutigalugu pisiortorfinnik pisisartunillumi ataavartumik tutsuigeqatigiinnermillu suleqateqarnerput tunngavigalugu pingaarnertut aallussatsinnik nunarsuarmi niuerfinnut assigiinngitsunut tamanut tunisaqarsinnaasarpugut. Tamanna Royal Greenlandip tunngaviani; aalisakkanut, pisisartunut atuisunullu qaninnerpaajunissarput kissaatigaarput erserpoq.

Akileraareernermi angusat 173 millioner koruuniupput, tamatumanilu ingerlatseqatigiiffiup agguagarsiassat pillugit politikkia naapertorlugu 87 millioner koruunit tassa angusat affaat piginnittumut immikkoortinneqartussaagaluarput. Pilersaarusiukkamilli aningaasaliinernit iluanaaruteqarluartoqarnerata kingunerisaanik agguagarsiassatut100 millioner koruunit immikkoortinneqarnissaasa ataatsimeersuarnermi akuerineqarnissaat innersuussutigineqarpoq.

Taamatuttaaq Royal Greenlandip aalajangerpaa, kilisaatit tunisassiorfittallit marluk; Sisimiut aamma Qaqqatsiaq nutaanik taarserneqassasut. Kilisaatit nutaarluinnaat 2019-imi tunniunneqassapput, ingerlatseqatigiiffiullu oqaluttuarisaanerani aatsaat taama annertutigisumik aningaasaliissuteqartoqarpoq.

Pilersaarutit malillugit annertuumik aningaasaliinerit annertusineqarnerat pissutigalugu akiitsut ernialersukkat amerlipput, tassa ukiup naanerani 1,3 milliarder koruuniummata massa siorna ukiumoortumik naatsorsuutit naapertorlugit 1,1 milliarder koruuniusut. Nammineq pigisat maanna 1,4 milliarder koruuniupput patajaassuserlu 32 %-iuvoq, taamaattumik suliffeqarfissuaq Royal Greenland aningaasatigut sutigut tamatigut patajaatsumik inissisimavoq.

Ingerlatseqatigiiffiup ukiuni arfinilinni kingullerni ineriartorluarnera 2017-imi attanneqaannassasoq ilimagineqarpoq. Taamaattumik 2017-imi qaammatit aqqaneq-marluk tunngavigalugit angusat amerlanerussangatinneqarput. Aningaasaliinerit suli annertussapput, taamaammat akiitsut ernialersukkat 2017-ip ingerlanerani 1,6 milliarder koruunit missaanni amerlassuseqalernissaat naatsorsuutigineqarpoq.

Aningaasaqarnermi angusassat aalisagaqassutsip tamatumalu kingunerisaanik ingammik Kalaallit Nunaanni Canadamilu pisassiissutigineqartussanit - Royal Greenlandimit pinngitsoorneqarsinnaanngilluinnartunit tunngaveqarluinnassapput. Tamatuma saniatigut nunarsuarmi aningaasaqarniarnerup ineriartornera aamma ingerlatseqatigiiffiup ingammik pingaarnertut tunisassiaanik tunisinermi akit ineriartornissaat aamma pissutaaqataajumaarput.

Asseq

 
 

Royal Greenland aperiguk

i
Write the text from the image