Dronning Ingridip Napparsimavissuani igaffimmi pisortap tullersortaa Heidi Sikemsen tunisassianik saqqummiussisoqarnerani peqataasup Royal Greenlandimi tunisassianik tuniniaasut naapinneri iluarisimaarpaa:

- Tunisassianik tuniniaasut qanimut naapillugit oqaloqatigalugillu assut iluarpoq. Tuniniaasut tunisassiat tuniniakkatik pillugit saqqummiussilluaqaat, uangalu assut iluaraara kalaallit oqaasii atorlugit saqqummiussimmata, Heidi Sikemsen oqarpoq.

- Tunisassianik pioreersunik tunisassianillu nutaanik ussiititsillluta saqqummiussinerput nutaaliorluta pisisartutsinnik naapitseneruvoq. Pisisartuvut arlaqaqisut sassaalliutigisatsinnik ussiaartorlutik takkuttut aamma saarulliip nerpiinik Royal Greenlandip tunisassiaa nutaaq Nutaaq Cod ilaatigut aamma usserpaat, Royal Greenlandimi Nunatsinni tunisassianik tuniniaavimmi ingerlatsisoq Malik Hegelund Olsen oqarpoq, nangipporlu:

- Pisisartutta suleqatigilluarnerisigut pisariaqartitaat ilisimanerulerusuppavut soorngunami aamma Royal Greenlandip tunisassiaatai taakku tunisassianik pioreersunik nutaanillu pisinerunissaat kissaatigaarput. Taamattumik tunisassiaativut illinnasaarlugit pisisartutsinnut sassaalliutigissallugit isumassarsiaraarput.

Pisisartut nuannaraat

Tunisassianik saqqummiusssinermi ussiititsinermilu ilaatigut Royal Greenlandip saarulliit nerpiinik tunisassiaa nutaaq Nutaaq Cod illinnasaarlugu sassaalliutigineqartoq pisisartuttta usserpaat. Nuummi Royal Greenlandip allaffissuani nerisarfiani igasup Sune Bjerrep aamma eqaluit pujuukkat, oquutaq akuutissartaqanngitsoq, aalisakkanik frikadeliliat, kapisilik pujuugaq aamma qeeqqap nerpia sassaalliutigai.

-Royal Greenlandip tunisassiaataanik assigiinngitsorpassuarnik alutornartumik piareersarneqarsimasunik sassaalliiffigineqarpugut. Royal Greenlandip tunisassiaataanik pisisarpugit kisianni tunisassianik nutaanik aamma pisisalernissarput qularnanngilaq, Heidi Sikemsen oqarpoq.

Pisisartut naapillugit tunisassianik saqqummiussineq pitsaasuusoq Nunatsinni tunisassianik tuniniaavimmi ingerlatsisoq naliliivoq.

- Saqqummiussinerput ingerlalluaqaaq taamaasioqqinissarpullu qularnanngilaq. Pisisartuvut soqutiginnillutik aaqqissuussineq nuannaraat. Saqqummiussinermi ilaatigut aamma pisisartutta pisariaqartitamik suuneri pillugit immersugassanik immersuipput, tamanna uagutsinnut iluaqutaassaaq, Malik Hegelund Olsen oqarpoq.

Saqqummiussinermi pisisartut peqataasut puussiaaqqanik ilaatigut Royal Greenland pillugu paasissutissanik, iganermut ilitsersuutinik, tunniuttakkanik aammalu raajanik qalipalinnik qalipaqanngitsunillu malinnik tunineqarput.

Tunisassianik saqqummiussinermi assilisat allaaserisap naqqani takuneqarsinnaapput

Allattoq: Inga Egede, ineg@royalgreenland.com

Assiliisoq: John David Eriksen.

Asseq

 
 

Royal Greenland aperiguk

i
Write the text from the image