- Royal Greenlandip tunisassiorfianut tunisinerup ammaqqinneqarnera uannut isumalerujussuuvoq, aalisakkanik amerlanerusunik tunisisinnaalerpunga taamaasillungalu aningaasarsiornerusinnaallunga, taamak oqarpoq aalisartoq 42-inik ukiulik Hans Kristian Mørch, Uummannami  apriilip aappaani qaleralinnik 3,3 tonsinik oqimaatsigisunik Royal Greenlandip tunisassiorfianut tunisisoq.

Hans Kristian Mørch sikumi Uummannap eqqaani aalisarami pisani ullut unnuallu marluk affarlu atorlugit pisarai. Qassutit ningittakkallu atorlugit aalisartarpoq pisanilu kaarimut ikillugit qamuteralamminik assartortarpai.

- 1600 kilot qassutit atorlugit pisaraakka 1700 kilollu ningittakkat atorlugit pisaralugit. Ikiorteqartarpunga aalisaraangama ikiortigisartakkannik, Hans Kristian Mørch oqarpoq.

Tunisassiorfiup tunisineq tunisassiornerlu nalimmassarniarlugit pilersaarusiukkamik tunisisarnera peqqutigalugu Uummannami aalisartut allat assigalugit Hans Kristian Mørch Royal Greenlandip tunisassiorfianut tunisissagaangami piffissamik inniminneeqqaartassaaq.

- Apriilip tallimaani tuniseqqissaanga, tunisisarnerli akulikinnerusinnaagaluarpat aalisakkanik amerlanerusunik tunisisinnaagaluarpunga. Tunisassiorfiup atortuginnerulluni uninngasuuteqarsinnaanerullunilu ammaqqinnera neriulluarfigaara, Hans Kristian Mørch oqarpoq.

Sulisussaaleqivoq

Kisianni, Royal Greenlandip tunisassiorfia Uummannamiittoq nutarterneqareerluni allilerneqareerlunilu aalisakkanik amerlanerusunik tunisassiorsinnaaleraluarluni, qerinasuartitsillunilu uninngasuuteqarsinnaaleraluarluni, suli pilersaarusiukkamik tunisisarallassaaq.

- Ammarnitsinniilli sulisussaqarniarneq unammillernartipparput. Ammaqqaratta qalerallit niaquerlugit paperulerlugillu tunisassiaraavut, kisianni sapaatiummalli qalerallit ilivitsuutiinnarlugit qeriterpavut. Sulisut pingasut nunaqarfimmeersut sulilersinnerisigut suleqatittalu ilaasa pikkorissarnissaasa taamaatinneratigut sulisussaaleqineq iluarsiiviginiarsimavarput. Pingasunngornermiit qaleralinnik niaquikkanik paperuiakkanillu tunisassiorneq aallarteqqissaaq, kisiannili nerpiliorluta tunisassiulissagutta tunisassiorfimmi sulisunik amerlanerusunik atorfissaqartitsivugut, Uummannami Royal Greenlandip tunisassiorfiani ingerlatsisoq Kirsten Nielsen Jensen oqarpoq.

Uummannami aalisartut Royal Greenlandip tunisassiorfianut tunisisartut tunisassiorfiup nutarterneqarlunilu allilerneqarnerata nalaani umiarsuarnut tunitsiviusunut assigiinngitsunut marlunnut tunisisarput, umiarsuup aappaa - sikunnginnerani – Uummannap eqqaani immamiippoq.  Sikoreernerata kingorna aalisartut umiarsuarmut tunitsivimmut tunisassiorfiup eqqaaniittumut tunisisarput. Tassani Royal Greenlandip tunisassiorfiani sulisut 16-it tunisassiorfiup nutarterneqareerluni sapaatip-akunnera kingulleq tunisassioqqilernissaata tungaanut paarlakaattut marlunngorlutik sulipput.

Allattoq assiliisorlu: Inga Egede, ineg@royalgreenland.com

Asseq

 
 

Royal Greenland aperiguk

i
Write the text from the image