- Pingaarnertut Royal Greenlandimi sulisut ulluinnarni sulinerminni imminnut attaveqaqatigiilluarnissaat ataatsimiinnerup siunertaraa. Ukioq manna ataatsimiinnitsinni tunisassiatta pitsaassusiat qanoq pingaaruteqartiginersoq ammalu piffissami agersumi suannik tunisassiornissaq pingaarnertut sammineqarput, Royal Greenlandimi tunisassialerinermi ingerlatsisoq Sten Sørensen oqarpoq.

Paasisaqarfiuvoq

-Ulluinnarni suliassat pingaarutillit aamma ajornartorsiutit sulinitsinni nalaattakkavut pillugut akornatsinni oqaloqatigiissutigigatsigit ataatsimiinneq pissarsiffiulluarpoq. Tunisassiarisatta pitsaalluinnartuullutik tunisassiarineqarnissaat qanoq pingaaruteqartiginersoq paasilluarpara, tunisassianik nalunaarsuinermi qarasaasiakkut atortorissaarut Royal Greenlandimi atorneqartoq SAP-ip atornissaanut tunngasunik paasisaqarpunga aamma Royal Greenlandip tunisassiaasa nunarsuarmi tunineqarneranni pitsaassuseq qanoq pingaaruteqartiginersoq paasisaqarfigaara, 27-inik ukiulik Lars Peter Berthelsen Sarfannguani tunisassiorfimmi ingerlatsisoq oqarpoq.

Sineriammi Royal Greenlandip tunisassiorfiini ingerlatsisut aamma tunisinermi aqutsisut ukiut kingulliit ingerlanerini pingajussaa ataatsimiisinneqarput. Lars Peter Berthelsen ataatsimiittarnerni aappassaa peqataasup ataatsimiinnermi paasisani naammagisimaarpai.

- Ukioq manna ataatsimiinnermi paasissutissanik immersorneqarnera naammagisimaarpara. Aamma nunaqarfinni tunisassiorfinni akisussaasuusugut Royal Greenlandip aallussaanik malinnaatinneqarnerput taamatuttaaq nunarsuarmi tunisassianik tuniniaanerni tunisassiat pitsaassusiat qanoq pingaaruteqartiginersoq paasisaqarfigigakku ataatsimiinneq naammagisimaarpara, Lars Peter Berthelsen oqarpoq.

Attuumassuteqarnerat paasivaa

Ataatsimeeqataasuni arnartatuaasoq Attumi tunisassiorfimmi ingerlatsisuugallartoq Arnaq Gjerulff oqarpoq Royal Greenlandimi tunisassianik nalunaarsuinermi qarasaasiakkut atortorissaarut SAP maanna ilisimaarillualerlugu.

- Qujavunga ataatsimiinnermi peqataanissannut periarfissaqartinneqarama. Maanna SAP-ip atornissaa atorneqarneranullu siunertaq ilisimasaqarfiginerulerpara. Misigivunga maanna ikiorneqaqqaarnanga namminersorlunga SAP atorsinnaalerlugu. Ilisimalikkakka Attumi suleqatinnut ingerlateqqikkusuppakka taakku aamma tunisassiat pitsaassusiisa aamma SAP-ip atorneqarneranut qanoq imminnut attuumassuteqarnersut paasiniassammassuk, 29-inik ukiulik Arnaq Gjerulff oqarpoq.

Sineriammi Royal Greenlandip tunisassiorfiini ingerlasisut tunisinermilu aqutsisut ataatsimiinneranni nunaqarfinni tunisassiorfinni ingerlatsiut Ilulissat kujataanersut ukioq manna peqataatinneqarput. Maniitsumi, Nuummi Narsamilu tunisassiornermi ingerlatsisut ataatsimiinnermi aamma peqataapput.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image