- Karsersuit ninngusuut atortaligassavut misilittaleruttorpavut, taakkualu ima ninngutigipput allaat 20-eriarluni atorneqarsinnaallutik. Royal Greenlandip Sisimiuni raajanik tunisassiorfia karsersuarnik ninngusuunik assigiinngitsunik tallimanik avammullu nassiutinnginneranni immerneqartartussanik nassitsivigineqarpoq. Karsersuit ninngusuut pineqartut raajanik tunisassianik naammasseriikkanik Royal Greenlandip Sisimiuni Ilulissanilu tunisassiorfiutaaniit poortoqqitassatut Royal Greenlandip Aalborgimi tunisassiorfianut nassiussinermut siunissami atortalernissaat anguniarparput, Royal Greenlandip pisiortornermut immikkoortortaani Svenstrupimiittumi poortuutissat pillugit ilisimasalittut sulisoq Jørgen Møller oqarpoq, nangipporlu:

- Karsersuarnik ninngusuuginnarnik atuisalerutta Royal Greenlandip pappialanik atuinera ukiut sisamat ingerlaneranni annerpaamik 68 procentimik annikillisinnaavoq, CO2-mik aniatitsinera annerpaamik 63 procentimik annikillisinnaavoq kiisalu poortuutissanik pisiortornermut aningaasartuutigisartagai annerpaamik 45 procentimik ikilisinnaapput.

Atoqqiineq annertunerulissaaq

Royal Greenlandip Sisimiuni Ilulissanilu tunisassiorfiini raajanik tunisassianik avammut nassiussinermut karsersuit ninngusuut ukiumut 11.000-t missaat Royal Greenlandimit atorneqartarput. Jørgen Møller oqarpoq, karsersuarnik ninngusuunik atoqqinneqarsinnaasunik atoqqiisarneq Royal Greenlandip karsersuit ninngusuut ukiumut atortagai 3000-innanngornerannik kinguneqarsinnaavoq.

- Karsersuit ninngusuut massakkut atortakkavut ataasiarluta atoreeraangatsigit igittarpavut. Poortuutissanilli atoqqinneqarsinnaasunik atuisarnitta annertusinissaa ukiuni kingullerni sulissutigaarput. Karsersuit ninngusuut misileraalluta atugassavut sapaatip-akunnerani matumani immerneqariarlutik Sisimiuniit Aalborgimut qaammatip naanerani nassiunneqassapput, Jørgen Møller oqarpoq.

Jørgen Møllerip poortuutissanik nutaaginnarnik 2017-imi ukiap ingerlanerani atuisoqartalissasoq ilimaginerarpaa.

Karsersuit ninngusuut massakkut atortakkatta nutaallu atortaligassatta angissusaat assigiipput; centimeterinik 120-nik takissuseqarlutillu meteritut ataatsitut silitsigalutillu portutigipput. Karsersuit ninngusuut raajanik 610 kiilunik imaqarsinnaasut containerinut 40 fodsinut karsersuarnik ninngusuunik 40-nik imaqarsinnaasunut issoraateriarlugit assartorneqartarput.

Raajat karsersuarnut ninngusuunut issoraanneqartartut puussianik plastikkinik ninngusuunik kiilut tallimakkaarlugit poortugaapput.

Allattoq: Inga Egede, ineg@royalgreenland.com

Assiliisoq: RG

Asseq

 
 

Royal Greenland aperiguk

i
Write the text from the image