Saarulliup nerpia immikkut tunisassiaq Maniitsumeersoq - Nutaaq Cod – tunisassiani immikkoortukkaani qerisuni tunisassiatut pitsaanerpaatut toqqarneqarpoq taamaasillunilu Fish Star Awardimik nersornaaserneqarluni. Aamma Royal Greenlandip saarullik pujuugaq tunisassiaa nutaaq, GOURMET Sliced torsk, tunisassiani pujuukkani tunisassiatut pitsaanerpaatut nersornaaserneqarpoq.

- Nersornaatit marluk taakku pissarsiarineri assut tulluusimaarutigaagut. Annermik tulluusimaarutigaarput nersornaat Nutaaq Cod-imut tunniunneqartoq, kiisami tunisassiatsinnut pitsaasumut immikkuullarissumullu nersuineq naleqqulluinnartoq pivarput, Royal Greenlandip tuniniaanermi immikkoortortaani Bremenimi Tysklandimiittumi tuniniaanermut ingerlatsisoq Rene Stahlhofen taamak oqarpoq.

Immikkoortut arfinillit

Nersornaatit Fish Star Awardsit immikkoortuni assigiinngitsuni arfinilinni tunisassianut pitsaanerpaanut tunniunneqartarput. Immikkoortuni arfinillinni taakkunani nersornaatit Fischwirtelschaftsgipfelimi peqataasunit toqqarneqartarput. Tunisassiat immikkoortuni arfinilinneersut igalaaminernik karsiusaliani saqqummersinneqartarput, aammattaaq peqataasut piukkunnerusaminnik toqqaannginnerminni tunisassiat ussissallugit periarfissaqartarput.

- Tunisassiat Royal Greenlandimeersut marluk nersornaasigaaneri Royal Greenlandip Tysklandimi tuniniaaneranut pingaaruteqarluinnarput. Saqqumersitsinersuarmi peqataasut nioqqutissat pitsaanerpaat toqqartarmatigit Royal Greenlandip tunisassiaasa tyskinit tuniniaaqqittartunit aammalu nioqqutissanik nalinginnaasunik tuniniaasartunit malugineqarneri avaqqunneqarsinnaanngillat, Royal Greenlandimi nunatsinni tunisassianut tuniniaanermi ingerlatsisoq, Royal Greenland sinnerlugu sulisut allat peqatigalugit ulluni 21. aamma 22. Februaari 2017-imi Fischwirtelschaftsgipfelimi Hamborgimiittumi peqataasoq, Malik Hegelund Olsen oqarpoq.

Aalisakkerinermik suliaqartunut ataatsimeersuarneq

Fischwirtelschaftsgipfel Hamborgimi ataatsimeersuarneruvoq Tysklandimi aalisakkerinermik suliaqartunit ukiut allortarlugit ingerlanneqartartoq. Aalisakkerinermik suliaqartut, ilisimatusarnermi ilisimasallit, ilisimatuut misissuisartut, tuniniaanermi niueqatigiinnermilu aalajangersaasut, inuussutissalerisut, igaffissualerisut aammalu politikerit ataatsimiittarput aalisakkerinermi unamminartut atuuttut oqaluuseralugit.

- Hamborgimi Fischwirtelschaftsgipfeleqartoqarnerani peqataanera assut pissarsiaqarfigaara sulinissanut pilersaarusiornernut ukiumoortunut aammalu saqqummersitsinernut assingusunut siunissami peqataaffigisinnaasatsinnut piareersarnermut isumassarsiorfigigakku, taamak oqarpoq Malik Hegelund Olsen, Royal Greenland sinnerlugu Nutaaq Cod-imut Fish Star Awardimik nersornaammik tigusisuusoq.

Saarullik pujuugaq GOURMET Sliced torsk, tunisassiani immikkoortukkaani pujuukkani pitsaanerpaatut toqqagaasoq, Royal Greenlandip tunisassiaasa nutaanerpaat ilagaat, taanna kapisilik immikkut ittumik pujuugaq 2016-imi ukiakkut saqqummersinneqarmat aamma saqqummersinneqarpoq.

Royal Greenlandip Bremenimi immikkoortortaa Nutaaq Codimik saarullinnillu pujuukkanik tuniniaanermini poortuutissani atorneqartuni Fish Star Awardimik nersornaasigaasimaneq ukiuni marlunni ussassaarutigisinnaavaa.

Allattoq: Inga Egede, ineg@royalgreenland.com

Assit: Malik Hegelund Olsen, Rene Stahlhofen

Asseq

 
 

Royal Greenland aperiguk

i
Write the text from the image