Tunisassiorfinni sulisut tunngaviusumik ilinniarfissaat ajornanngippat 2017-imi aallartinneqarnissaa suleqatigiinnit siunertarineqarpoq.

- Tunisassiorfinni sulisunut allatigulluunniit aalisakkerivinni suliaqartunut ilinniarfik annertuumik pisariaqartinneqarpoq. Taamaattumik Sulisitsisut suleqatigalugit tunisassiorfimmi sulisut tunngaviusumik ilinniarfissaat pilersinniarlugu pilersaarut suliaraarput. Pilersaarut susassaqartunit oqallisigineqareerpat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut tunniunneqassaaq. Kingorna politikerit aalajangissavaat ilinniagaq qaqugu aallartinneqarumaarnersoq, Royal Greenlandimi sulisoqarnermi pikkorissaanermillu imikkoortortami ingerlatsisoq Christian Laursen oqarpoq.

Sulisoqarnermi pikkorissaanermillu immikkoortortami ingerlatsisoq aamma oqarpoq, tunisassiorfimmi sulisut ilinniarfiannik pilersitsinikkut tunisassiorfinni sulisut ilinniarluarsimasut pikkorissullu sulisorineqartalernissaat siunertaasoq.

- Suliffissuit aalissakkanik tunisassiornermik aallussallit ineriartortipiloorneqarmata taakkununnga piumasaqaatit tunisassiorsinnaalluarnermut, pitsaassutsimut, tunisassioriaatsinik nutaanik akuersinermut minnerunngitsumillu oqartussaasut pisisartullu piumasaqaataannik eqquutsitsinermut tunngasut sukaterneqarnissaat pisariaqarpoq. Taamaattumik ilinniarfimmik pilersitsinissaq pisariaqarluinnalersimavoq, taannami aqqutigalugu aalisarnermik qaffasinnerusunik ilinniarsinnaanerup ammaanneqarsinnaanera periarfissanngussammat. Tunisassiorfinni sulinerup pilerinartunngornerulersinnissaa siunertaraarput. Ilinniarfimmik taamaattumik aallartitsineq Royal Greenlandimuinnaanngitsoq aammali Kalaallit Nunaanni aalisakkanik tunisassiortartunut tamanut iluaqutaassaaq, Christian Laursen oqarpoq.

Sullinniakkat

Inuusuttut - ajornanngippat meeqqat atuarfianni naammasseqqammersut imaluunniit inersimasut tunisassiorfinni sulisutut sulinermik imaluunniit kilisaatini inuttatut – misilittagallit ilinniarfimmik pilersitsinikkut sullinniarneqarput. Aalisakkerinermi susassaqartut ilinniarfeqarfiillu ilinniakkap imarisinnaasaanik tunngaviliisuussapput, kisiannili fysiki, kemi tuluillu oqaasii atuartitsissutitut pingaarnertut tunngaviusumik ilinniartitsissutigineqassapput. Atuartitsissutit taakku saniatigut aamma tunisassiassat suunerinik ilinniarneq, aalisakkanik tisaneq, tunisassiassanik suliarinninneq, teknikkikkut atortorissaarutinik, tamatumani nillusaavinnik qerinasuartitsivinnillu atuineq amoniakkilerinerlu kiisalu tunisassianik nakkutilliineq atuartitsissutigineqartunut ilaatinneqassapput. Ilinniarnerup ingerlarnga suliffimmik sivikinnerpaamik ukiup affaanik sivisussusilimmik misiliinermik ilaqassaaq.

Allaaserisaq tamaat Navigatiomi saqummersumik kingullermi uani atuarneqarsinnaavoq:

www.royalgreenland.gl/kl/Immikkoortortat/Attaveqatigiinneq/Attaveqatigiinnermut-immikkoortortaq/Navigatio

Allatooq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image