Aappilattumi tunisassiorfik nutaaq atuutileruni maanna quersuarmi qerititsiviutigisumi atuuttumiit marloriaataa sinningaatsiarlugu annertunerusumik imartussuseqasssaaq, taamaattumik Aappilattumi ukioq naallugu tunitsivimmut tunisisoqarsinnaalissaaq.

- Tunitsiviup isaterneqarnera junimi 2017-imi aallartinneqassaaq. Isaterneqareerpat tunisassiorfik nutaaq sanaartorneqalissaaq. Tunisassiorfik nutaaq atuutilerpat quersuaq qerititsiviutigisoq maanna 150 tonsinik imaqarsinnaasoq marloriaataa sinningaatsiarlugu imaqarsinnaassaaq. Quersuup qeritsitisviutigisup annertunerungaatsiartumik imaqarsinnaalerneratigut aalisartut ukioq naallugu tunisisinnaalissapput taamatuttaaq tunisassiorfimmi sulisut ukioq naallugu suliassaqalissallutik, Upernavimmi Royal Greenlandip tunisassiorfiini tunisassialerinermi ingerlatsisoq Flemming Andersen oqarpoq.

Marloriaammiit annertunerusumik

Tunisassiorfik nutaaq atuutilerpat aamma tunisassiornermi periutsit allanngussapput. Ullumikkut aalisakkat tunisat qeritinneqartarput, tunisassiorfilli nutaaq atuutilerpat aalisakkat niaquerlugillu paperuikkat tunisassiarineqarlissapput.

- Maanna aalisakkat tunisat ataasiakkaarlugit qerititerneqartaramik qerititsivimmi initoorujussuusarput. Tunisassiorfiup nutaap sanaartorneqarnerani qerinasuartitsiviit marluk -tamarmik aalisakkanik 20-25 kilukkaanik qerinasuartitsisinnaasut ikkussuunneqassammata aalisartut aalisakkanik maannamiit annertunerujussuarnik tunisisinnaalissapput. Ilutigalugu aalisakkat niaquerlugit peperuikkat tunisassiarilissagatsigit sulisut ukioq naallugu sulisinnaalissapput, Flemming Andersen oqarpoq.

Taanna aamma oqarpoq Sulinermut Nakkutilliisoqarfiup piumasaqaatai naapertorlugu naleqqussaasoqassasoq.

- Tunisassiornermi atortorissaarutit atuuttut allanngungaassanngikkaluarput, kisianni pitsanngorsarneqarlutik naleqqussarneqassapput. Taamatuttaaq tunisassiorfimmi sulisunut atortorissaarutit pitsanngorsaavigineqassapput.

Flemming Andersenip naatsorsuutigaa maanna sulisut quliusut tunisassiorfik nutaaq atuutilerpat pingasunik ilaneqarumaartut.

Nutarterineq allilerinerlu

Taamatuttaaq Kullorsuarmi tunisassiorfik nutarterlugu containerinik qerititsiviutigisunik nutaanik ivertissuiniarlu Royal Greenlandi pilersaaruteqarpoq.

- Manna containerit qerititsiviit arfiniliusut qulinik ilaneqassapput. Containerit qerititsiviit ilanerisigut neriuutigaarput ukiumi sikuunera tamaat aalisartut tunisisinaalissasut. Qerisunik annertunerusunik inissaqartitsinerulernikkut sulineq ingerlaavartoq atuutsinneqarsinnajumaartoq neriuutigaarput. Neriuutigaarputtaaq sulisut suliassaarunneq pissutigalugu angerlartiinnartariaqartarneri pinngorsoortissannaalerumaarlutigu, Flemminga Andersen oqarpoq.

Kullorsuarmi tunisasssiorfimmi annertuumik nutarterisoqassaaq –tunisasiorfiup natii aammalu isariai ilaatigut nutarterneqassapput-

Kullorsuarmi Royal Greenlandip tunisassiorfiani nuterterineq containerinillu qeritsitsivinnik nutaanik ikkussuineq 2017-imi junimi allartinneqassaaq septemberimilu naammassineqarnissaa naatsorsuutigineqarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image