- Suliniutit pingasut 2017-imi upernarpat ingerlatilissavagut. Ammassaat suaannik, siuteqqunik imarmiunik inalualinnillu tunisassiornerit imminut akilersinnaanersut paasiniassavarput, Royal Greenlandip tunisassiassanik inerisaanermut immikkoortortaani aqutsisoq uumassusilerisutullu ilinniarsimasoq Nikoline Ziemer oqarpoq.

Tunisiffissaqarpoq

Nikoline Ziemerip oqaatigaa, ammassaat suaannik inalualinnillu tunisassianik Kangiani tunisiffissaqarluartoq taamatuttaaq siuteqqunik imarmiunik tunisassianik Frankrigimi tunisifffissaqarluartoq.

- Ammassaat suaannik tunisassiat Kangiani niuerfinnit soqugitineqarput, ammassaallu suaat nerisassianut kusassaatitut atorneqarsinnaasutut nittarsaanneqartarput. Taamaattumik ammaassaat suaannik tunisassiortalersinnaanerluta paasiniarlugu Nuup Kangerluani ammasaqarluarnersoq taamatuttaaq arnavissat suffinnginnerini angutivissat arnavissallu immikkut aalisarneqarsinnaanersut misissussavarput. Ilimagaara angutivissat upernaakkut sissaq sinerlugu ingerlaartartut, massa arnavissat avasinnerusumi ingerlaartartut. Arnavissat maajimi-juunimi suffinnginneranni aalisartarnissaat siunertaavoq, Nikoline Ziemer oqarpoq.

Ammassannik, siuteqqunik imarmiuni inalualinnillu sumiiffinnut ornigulluni misissuinerit Nuup Kangerluani ingerlanneqassapput.

- Qeqertaq qaqqap Sermitsiap eqqaaniittoq imarmiunik siuteqqunik peqassangatipparput. Siuteqqut imarmiut Frankrigimi mamarineqarluartuupput. Siuteqqullu imarmiut Kalaallit Nunaata imartaaneersut franskinit soqutigineqarluarmata sumi peqarluarnersoq taamatuttaaq annertussusaallu tunisassiarineqarsinnaanngornissaannut naammannersut paasiniassavara.

Inaluallit Kinami mamartuliarineqartartut mamarineqarluartuusullu immami 50 meteritut ititigisumiittarput – aamma Kalaallit Nunaanni, taakkualu Kalaallit Nunaanni nerineqarneq ajorput.

- Inaluallit assigiinngitsorpassuartigut nerisassiarineqarsinnaapput, tassa suppamut akugineqarsinnaapput sivikitsumilluunniit sianeqarsinnaapput. Inaluallit siuteqqutulli imarmiutut qeritinneqarsinnaammata suliariuminartuullutillu assartoruminarput. Taamaattumik tunisassiarissalissagaluarutsigit pisariitsumik assartorneqarsinnaapput. Aatsaalli tunisassiarinissaannut periarfissaqassagutta, tamannalu misissorlugu aallartittussanngorparput, Nikoline Ziemer oqarpoq.

Sumiiffinnut ornigulluni misissuineq

Nikoline Ziemer Nuup Kangerluani sumiiffinnut ornigulluni misissuinerit nammineq ingerlassinnaajumallugit sumiiffinnut ornigulluni misissuinerit maajimi ingerlatinnginneranni angallammik ingerlatsisinnaanermut uppernarsaatitaaqqaassaaq.

- Misissuinissanut atatillugu aalisartumik misilittagaqarluartumik peqateqarlunga misissuinerit nammineq ingerlassinnaaniassagakkit Royal Greenland Poca 770-imik pisivoq.

Nikoline Ziemer aalisartumik misilittagaqarluartumik Nuumminngaanneersumik peqateqarluni Nuup Kangerluani sumiiffinnut ornigulluni nammineq misissuiartortalernissaminut atatillugu ingerlatsisinnaanermut uppernarsaatitaarumallumi Ilulissani januaarip 18-ianiit februaarip 16-iata tungaanut pikkorissassaaq.

Allattoq: Inga Egede, ineg@royalgreenland.com

Assit: RG aamma internetti

Asseq

 
 

Royal Greenland aperiguk

i
Write the text from the image