- Qaleraliit tunisassiassat uninngasuutit marsip 31-iata tungaanut tunisassiorsinnaajumallugit juulleriartornerani juullillu kingorna tunisassiornitta unitsikkallarnissaa toqqarsimavarput. Kingusinnerusukkut qaammatini marlunni tunisassiorfiup matoqqasariaqalernissaa pinngitsoorumallugu juulleriartorneraniit januarip 23-iata tungaanut matoqqaniarluta toqqarparput. Tunisassiunngikkalarnitsinni sulisut 75-it tunisassiornermut tunngasunik pikkorissassapput allallu qulit eqqiaanermut tunngasunik sapaatip akunnera una tullialu pikkorissassallutik, Maniitsumi Royal Greenlandip tunisassiorfiani ingerlatsisoq Susanne Marie Knudsen oqarpoq.

Tunisineq ingerlaannarpoq

Sulisut decemberip 15-iani suliunnaarallartinneqartut 117-iusut ilaat 75 –it sapaatip akunnera una sapaatillu akunnarani tullermi tunisassiornermi periutsit assigiinngitsut soorlu tunisassianik nammineq nakkutillliinermut tunngasut, eqqiaanermut tunngasut , tunisassiat sunerinik ilisimasaqarnermut tunngasut, tunisassiornermi ilitsersuinermut aammalu tisasarnermut tunngasunik pikkorissartinneqassapput. Sulisut allat qulit ullup affaanik sivisussuseqartumik eqqiaanermut tunngasunik pikkorissartinneqassapput. Sulisut 75-it eqimattanut pingasunut avillugit ulluni pingasuni pikkorissartinneqassapput.

Sulisut pikkorissartinneqarnerat Royal Greenlandimi Sulisoqarnermi Pikkorissartarnermilu Imikoortortqarfimmi sulisut aammalu Inuussutissalerinermi Ilinniarfiup Inuilip sulisuinit ingerlanneqassaaq.

- Tunisassiorfimmi sulisut aqutsisui aamma allaffissornikkut suliaqartut tunisassiornerup unitsikkallarneqarnerani angerlatinneqarnikunngillat. Aamma tunisassiorunnaarallarnerup nalaani aalisartut pisaminnik tunisisarnerat unitsinneqanngilaq. Tunisassiorunnaarallarnermi aalisartut saarulliit qaleralllillu tunisaat qeritinneqartatput. Taamaattumik tunisassiorunnaarallarnerup nalaani tunisat annertussusaat aallaavigalugit tunitsivimmi sulisut aggersarneqartarput, Susanne Marie Knudsen oqarpoq.

Sukkasuumik tunisassiorput

- Qalerallit tunisassiassat Royal Greenlandip kilisaataataannit tulaanneqartarput. Decemberip aallartilaarnerani kingullermik tunisassiassatsinnik tulaassivigineqarpugut. Ukioq manna sukkasuumik tunisassioratta maanna tunisassiassat 1.000 tons missingi uninngasuutigaavut, taakkalu marsip 31-tungaanut suliassaqartitsissapput. Taamaattumik tunisassiorunnaarallartariaqarneq pinngitsoorneqarsinnaanngilaq. Kingusinnerusukkut, tassa februarip aallaqqaataaniit marsip naanera tikillugu qaammatini marlunni tunisassiorunnaarallarumanata juulleriartorneraniit juullereerneranut tunisassiorunnaarnissaq toqqarsimavarput, Susanne Marie Knudsen oqarpoq.

2014-imi Maniitsumi Royal Greenlandip tunisassiorfia annertuumik sanaqqinneqarpoq. 2015-imiilli novemberimiit apriilimi saarullinnik tisaanik Nutaaq Cod-inik tunisassiulernissap tungaanut qaleralinnik tunisassiortalernikuuvoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image