- Kilisaataaterput M/tr Tuugalik iluatsilluartumik siullerpaamik tamanut ammatipparput. Inuit 900-nit amerlanerusut kilisaammut alakkaapput. Qullersaqarfik inunnik 753-inik pulaartoqarpoq, massa inuit 536-t tunisassiorfimmut pulaartut. Unnuk Kulturisiorfiup Royal Greenlandimi ukioq manna ingerlanneqarnerani pulaartuvut siorna pullaartutsinnut 600-ungajaasunut sanilliullugit amerlanerupput, Royal Greenlandimi sulisoqarnermi allaffissornermi aqutsisoq Svend Larsen oqarpoq.

Royal Greenlandimi immikkoortortat pingasut Unnuk Kulturisiorfiup ingerlanneqarnerani tamanit alakkarneqarsinnaapput. Royal Greenlandimut pulaartut qullersaqarfimmi, tunisassiorfimmi M/tr Tuugaalimmilu tikilluaqquneqarput. Taakkua nalunaaqutaq 15:00-imiit nalunaaqutaq 19:00-ip tungaanut tamanut ammapput.

Aalisartuusaarfik meeqqanit nuanneqarineqarluarpoq

- Pingasunut ammarnerput iluatsilluarpoq, tassami meeqqat Royal Greenlandip tunisassiorfianut ukioq manna pulaartut amerlanerupput, Royal Greenlandimi tunisinermi tunisassiornermilu aqutsisoq Elias Didriksen oqarpoq, nangipporlu:

- Aalisartuusaarfik ingammik meeqqanit nuannarineqarluarpoq, aalisartuusaarfimmilu aningaasaliisut tunissutaannik assigiinngitsunik soorlu ballonginik, mamakujuttunik taartumilu akisuttartunik ulloq taanna pisaqartoqarsinnaavoq. Inersimasunut raajanik qalipaajaanermik aalisakkanillu nerpiiaanermik unammisitsinerit ukioq manna aamma nuannarineqarluarput. Raajanik qalipaajaanermik unammisitsinermi peqataasut 60-init amerlanerupput. Pulaartut amerlasuut aalisakkanik nerpiiaanermik unammisitsinermi aamma peqataapput, tassanilu aalisakkanik amerlanerpaamik nerpiiaasut ajugaasuusarput, Royal Greenlandip tunisassiorfiani tunisinermi tunisassiornermilu aqutsisoq Elias Didriksen oqarpoq.

Qullersaqarfiup nerisarfiani igasup Sune Bjerrep qaleralinnik raajanillu suppaliaa mamarluinnartoq mamarineqarluinnartorlu kiisalu iffiaq-qaqortuliaarai qallersuusikkat qullersaqarfimmut pulaartunut sassaalliutigineqarput, tassani aamma appisimaarpoq erinarsortartoq Nina Jørgensen taamatuttaaq Royal Greenlandimi ilinniartunngornissamut periarfissat pillugit paasissutissanik pissarsisoqarsinnaallunilu immersugassamik apeqqutinik 13-inik apeqqutilimmik immersuisitsinikkut eqquiniaasitsisoqarpoq.

- Ataatsimut oqaatigalugu Unnuk Kulturisiorfiup Royal Greenlandimi ingerlanneqarnera iluatsilluarpoq. Qullersaqarfik kilisaallu ornigarneqarluarput, massa tunisassiorfimmut ukioq manna pulaartut siorna pulaartunit ikinnerulaartut, Svend Larsen oqarpoq.

Raajanik qalipaajaanermik unammisitsinermi aalisakkanillu nerpiiaanermik unammisitinermi kiisalu eqquiniaatitsinermi ajugaasut Royal Greenlandip nunatsinni tunisassianik tuniniaaviani sulisunit sapaatip-akunnerata 4-p ingerlanerani attavigineqarumaarput.

Roya Greenlandimi Unnuk Kulturisorfimmi assilisat ataani takuneqarsinnaapput.

Igasup aalisakkanik suppaliaata nerisassiarineqarnissaanut ilitsersuut atuartunit:uani pineqarsinnaavoq

Allattoq: Inga Egede; ineg@royalgreenland@com

Assit: John David Eriksen

Asseq

 
 

Royal Greenland aperiguk

i
Write the text from the image