Royal Greenlandip Nuummi tunisassiorfia aalisartunik tallimat missaannik tulaassuisarnermi piumasaqaatinik pisisartut tunisassianik pitsaasunik piumasaqartarnerannik qulakkeerinnittussanik malinnissinnaanngitsunik ukiuni kingulliunerusuni annaasaqarpoq.

Nuummi tunisassiorfik ilaatigut tunisassiorfiup sapinngisamik aalisakkanik nutaanerpaanik tigooraasarnissaa qulakkeerumallugu Royal Greenlandip Kalaallit Nunaanni tunisassiorfii allat assigalugit tulaassuisarnermi pilersaarusiortarpoq,

- Pisisartut tunisassianik piumasaat aalajangersimalluinnartut qulakkeerumallugit tulaassuisarnermi piumasaqaatigut pissutigalugit aalisartut tulaanniagaraluagaannut ilaatigut qujaannartariaqartarpugut, Niels Hansen tunitsivimmi aqutsisoq oqarpoq.

Tulaassuisarnermi pilersaarusiap aalisartut suleqatigalugit pilersaarusiarineqartartup ilaatigut qulakkiigassaraa aalisakkanik suliarilluakkanik tunisassiorfimmut tulaassisarnissaq aammalu tunisassiorfimmi tunisassiornissamut pilersaarusiorsinnaanissaq.

- Aalisatut tulaassiniartut ilaasa paasiuminaatsittarpaat aalisakkanik sikulersugaanngitsunilluunniit imaluunniit aalisakkanik nutaanngilisimallutik aqiliulersimasunik tigusisinnaasannginnerput. Taamaammat aalisartunut ataasiakkaanut nassuiaatiginiartuarparput uatsinnut tulaassuiniarunik piumasaqaatitsinnik malinnittariaqartut, taamalu tulaassuinermi akimik qaffasinnerusumik namminneq pissarsillutik.

- Aalisartulli ilaat narraannartarput ilaatigullu Royal Greenlandimik akeqqiussisarlutik, taavalu unammillertinut tulaassuiartortalerlutik, Niels Hansen nassuiaavoq.

Niels Hansen nassuiaavoq aalisartut ilaat tunisassiorfimmik isumaqatigiissuteqaqqaaratik tulaassuiniartartut:

- Aalisartut paasiuminaatsittarpaat aalisakkanik nutaanerpaamik tunisassiorsinnaajumalluta aalisartut suleqatigalugit tulaassuisarnermik pilersaarusiortariaqartarnerput. Allaat unnukkulluunniit tulaassuisinnaagaluarpugut, kisianni sulisutta sulinissaat pilersaarusiorsinnaaniassagutsigit tulassuinissamut isumaqatigiissuteqartariaqarpugut.

Nuummi tunisassiorfik ullormut 30 tonsinik tulaassuiviusinnaasoq maanna aalajaatsunik pitsaasunillu tulaassuisinnaasunik tulaassuisoqarpoq. Sulili amerlanerusunik tulaassuisoqarsinnaagaluarpoq.

Tulaassuinerit nalinginnaasut ullaakkut arfineq marlunniit ualikkut sisamat tungaannut pisarput. Tamatuma saniatigut unnukkut tulaassuisoqarnissaanut isumaqatigiissusiortoqarsinnaavoq.

Allattoq assiliisorlu: Káte Hansen, kaha@royalgreenland.com

Asseq

 
 

Royal Greenland aperiguk

i
Write the text from the image