Ukioq manna ataasinngorneq juulip qulingat Royal Greenlandimi sulisut ilaannut Jens Olsvigimut pingaartorsiorfiuvoq. Ullormi taanna Ilulissani tunisassiorfimmi sulisuunermini ukiunik 50-inngortorsiorpoq.

Tunisassiorfimmut suliartoqqaarami 16-iinnarnik ukioqarsimavoq. Ullaassakkut tallimanut suliartorpoq raajanik qalipaajagassanik igarsuarmut uutsiterisutut ikiuutissalluni.

- Taamani tunisassiorfimmi sulisut arfinernoorlutik raajanik assaannarminnik qalipaajaalersarput. Uangalu raajanik nutaanik ullaakkut tulaassanik immikkoortiteralungalu uuttortaaneq qaammatit qulit missaanni suliassaraara.

Tunisassiorfimmi sulineq ukiup tullissaani unitsikkallarneqarpoq. Raajarniarneq qaffasinnerpaaffissaminiippoq, tunisassiorfillu allilerneqartussanngorpoq.

- Tunisassiorfik 1969-imi juulip qaammataani ammaqqinneqarpoq, avatangiisinullu nutaanut nutaalianik atortulinnik suliartorpugut. Taamaakkaluartoq sulineq assorornaqaaq, ulapiinnavikkattami. Taamatut 1969-imiit 1975 sulivugut. Raajarniutit 42 aamma 36 fodsinik angissusillit 50-it missaanniittut sinerissap qanittuani raajarniareerlutik ullormut tulaassisarput.

- Ukiut taakka misillerfiginerpaavakka, unnuarsiorlutami suliuaratta. Raajarniat ullaakkut aallarunik pisatik unnukkut tikiuttarpaat. Uagullu unnuarsiortuusartugut arfineq marluulluta unnukkoorutta ullaassap tungaanut raajanik nutaanik maskiinanut uutsitsivinnut issoraalluta sulisarpugut. Pingaartumik taarnerpaaffiani novembarimi decembarimilu ilungersunarnerpaasarpoq. Sila suli taartoq suliartorutta ullaassakkut suli taartoq soraassaagut, qaamaneranillu takusaqarneq ajorpugut, Jensi eqqaamasalikkersaarpoq.

Jensip eqqaamaniarpaa tunisassiorfimmi tunisassiorneq 70-ikkunniilli ulloq manna tikillugu qaffakkiartuinnavissimasoq. Ineriartorneq tunisassiorfimmilu nutaanngorsaaneq ilutiglaugu sulineq oqiliartorsimavoq. Jensilli nunatta avataanit suliartortitsisariaqalerneq akueriuminaatsippaa:

- 60-ikkunni 70-ikkunilu allaaneruvoq sulisussaaleqineq atuutinngimmat, kikkullu tamarmik sulisarmata. Uangalu 1981-imi sulisitsisunngorama inuusuttut suliartortaqqullugit kaammattortarnikuuakka. Avataanit tikisitsisariaqanngikkaluarpugut. Suliffissaaleqisut suliartorniassammata siunnersorluarnerusariaqarput.

Jens Olsvik ullumikkut 66-inik ukioqartoq tulaassuisarfimmi suli sulisitsisuuvoq. Ukiuni kingullerni qulit missaanni tulaassukkat kisitsisitaannik qarasaasiamut immiussuisarami suliaasa ilangaatsiai allaffissornermik suliassaqarfiupput.

- Qangatut oqimaattorsiorunnaaratta suliassat mersernarunnaarnikuupput. Taamaattumillu utoqqalinersiaqalernissaq suli eqqarsaatigilinngilara, Jensi oqarpoq.

Allattoq: Káte Hansen, kaha@royalgreenland.com

Assit: RG Ilulissat

Asseq

 
 

Royal Greenland aperiguk

i
Write the text from the image