- Saarulliit issimi panertitat kingulliit juni aallartilaartoq nassiunneqarput. Ilisimaneqareersutut ukiorissaaratta saarullinnik issimi panertitanik tunisassiornerput ukioq manna ingerlalluarpoq, Kangaamiuni Royal Greenlandip tunisassiorfiani ingerlatsisoq Kristian Larsen oqarpoq.

Suliassaqartitsipput

Nunatsinni mamarineqarluartunik tunisassiorneq novemberimi aallartinneqaraangat tunisassiorfimmi sulisut 16-it holdini marlunni sulisut januari ilanngullugu tunisassiassanik tisanermi panersiillunilu nivinngaatiterinermi sulisorineqartarput. Kingusinnerusukkut februarimiit juni ilanngullugu tunisassiat panertitertut poortorneqarnerini panertitassallu nutaat nivingaassorneqarnerini tunisasiorfimmi sulisut 14-it missingi sulisoqarineqartarput.

- Saarullinnik issimi panertitassatsinnik katersineq aggustusimi aallartittarparput. Novemberimi tunisassiassatsinnik tisalluta panertiterillutalu aallartinnitsinniit ingerlaavartumik tunisassianik poortuillutalu nutaanik nivinngaassuisarpugut. Taamalilluta siornatuut saarulliit panersigassat 35-40 tonsit paneramik tonist qulit missaannik annertussusillit ukioq manna tunisassiaraavut, tunisassiorfiup ingerlatsisua oqaluttuarpoq.

Kangaamiuni aalisartut saarulliit tunisaat tunisassiorfimmi issimi panerserlugit tunisassiarineqartarput kisiannili aamma soorlu Qeqertarsuarmi Royal Greenlandip tunisassiorfiani tunisanik issimi panertitassanik Kangaamiuni tunisassiorfik saarullinnik pajunneqartarpoq. Kristian Larsenilli neriuutigaa Kangaamiuni aalisartut tunisaannaannik issimi panertitanik tunisassiulerumaarlutik.

- Neriuutigaara Kangaamiuni aalisartut tunisaat kisiisa atorlugit saarullinnik issimi panertitanik tunisassiorsinnaalerumaarluta– taakkumi suliaralugit pisariunnginnerullutillu mamarnerummata, Kristian Larsen oqarpoq.

Sapaatip akunnerani uani Kangaamiuni Royal Greenlandip tunisassiorfiani ukioq manna saarullinik qerititerilluni tunisassiorneq aallartippoq. Saarullinnik issimi paneritanik immikkoortiterilluni qerititerineq aggustusimi aallartissaaq.

Kalaallit Nunaat tamaat pilersorpaa

Royal Greenlandip nunatsinni tuniniaviani Nuummiittumi saarulliit issimi panertitat mamarineqaqisut poortoriarlugit nunatsinni pisiniarfissuarnut pisiniarfinnullu mikinerumaanut nassiussortarput.

Saarulliit issimi panertitat Attumi Akunnaani kiisalu Uummannami Royal Greenlandip tunisassiorfiini aamma tunisassiarineqartarput. Siorna junimiit ukioq manna marts ilanngullugu Uummannami Royal Greenlandip tunisassiorfia nutarterluni suliarineqarnera pissutigalugu ukioq manna Uummannami saarullinnik issimi panertitanik tunisassiortoqanngilaq.

Royal Greenlandip Nuummi Maniitsumilu tunisassiorfiini saarulllit nerpii maskinanik panertitat tunisassiarineqartartut aamma nunarput tamakkerlugu tunineqartarput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image