Kinamiut kalaallillu isikkamik arsaallutik allunaasamillu nutsoruullutik unammiuaaqatigiinnerat iluatsilluarpoq unammisummi tamarmik ajugaapput; kinamiut allunaasamik nutsoruunnermi ajugaammata kalaallillu arsaalluni unamminermi 10-4-mik ajugaallutik.

- Kinamiut ilaat isikkamik arsarnikuunngisaannaramik tunuarsimaaraluarlutik arsaaffimmut appakaakkamik arsaannerlu aallartimmat ittoorunaarlutik arsaqataanertik nuannareqigaat kiinaasigut takuneqarsinnaavoq. Taamatuttaaq silami aaqqissuussineq peqataaffigigamikku nuannarilluinnarpaat, kinamiut sulisut nutserisuat Junfang Zhang oqarpoq, nangipporlu:

- Uagut allunaasamik nutsoruunnermi ajugaagatta tulluusimaaqaagut. Ajugaanitta takutippaa maani Qasigiannguaniinitsinni ilaqutariillutalusooq ikioqatigiilluarnerput.

Kaammattuuteqartoqarneratigut piviusunngorpoq

Qasigiannguani Royal Greenlandip tunisassiorfiani sulisut silami unammiuaaqatigiinnerat sulisut ilaasa kaammattuuteqarnerisigut piviusunngorpoq. Illoqarfimmi sunngiffimmi ingerlatsisoq sulisut isumassarsiaminnut akuutillugu aaqqissuussinermi peqataatimmassuk aaqqissuussineq piviusunngorpoq.

- Suleqatitaavut kinameersut aqqaneq marluk aammalu kinamiut Uummannamut suliartortut utaqqiisaasumik maanikkallartut qulingiluat kiisalu Qasigiannguani sulisuvut allat arfinngormat silami unammiuaaqatigiinnermi peqataapput. Silami unammiuaaqatigiinnermi silami qrillierigatta pølsit 17,5 kilo nerineqarput kommunillu tapiineratigut peqataasut imeriuarsaatitorlutik. Aaqqissuussineq aqqutigalugu sulisuusugut imminitsnnut qanillivugut, Qasigiannguani Royal Greenlandip tunisassiorfiani tunisassiornermi ingerlatsisoq, Gert Lyberth oqarpoq.

Iluatitsisutut misigipput

Kinamiullu maanna Qasigiannguani najugaqarnertik nuannarutigaat Qasigiannguanilu innuttaasunit tikilluaqqusaasutit misigalutik.

- Qasigiannguani innutaasut naapitavut tamarmik inoroorsaartarput inussiarnisaarlutik kiinamiusullu ilassiortarlutik. Illoqarfimmiunik ikinngutitaartorpugut suliffippullu assut nuannarigatsigu maani Qasigiannguani angerlarsimasutut misigivugut. Maaniinnerput nuannaringaaratsigu Qasigiannguani najugaqaratta iluatitsisutut misigivugut, Junfang Zhang oqarpoq, nangipporlu:

- Illoqarfimmi aaqqissuussinerni allani peqataarusuppugut guitarerneq imaluunniit keyboarderneq ilikkarusuparput minnerunngitsumillu kalaallit kulturiat pillugu ilisimasaqalerusuppugut kalaallisullu ilikkarusulluta.

Allaaserisap ataani Qasigiannguani sulisut arfinngormat unammiuaaqatigiinneranni assilisat takuneqarsinnaapput.

Allattoq: Inga Egede, ineg@royalgreenland.com

Assit: Gert Lyberth

Asseq

 
 

Royal Greenland aperiguk

i
Write the text from the image