- Nutaaq Cod tunisassiaavoq pitsaassussikkut immikkoorutilik, maanna uagut suliassarilerparput suliffeqarfissuup nunani assigiinngitsuni immikkoortortaani sulisut tunisassiap tuniniarnissaanut piareersassallugit. Royal Greenlandip Nutaaq- Codimik tunisassiornera annertusiartornera ilutigalugu tunisassiap tunineqarnerulernissaa anguniarlugu maanna Sisimiuni Maniitsumilu tikeraarluta Nutaaq Codip tunisassiarineqarnera pillugu paasisassarsiorluta angalavugut, Royal Greenlandimi tunisassianik immikkoortukkaalerinermi ingerlatsisoq, Niels Wann Jensen oqarpoq.

Tysklandimi Bremenimi Royal Greenlandip immikkoortortaani tuniniaasoq Marc Wobbe Machesterimi Royal Greenlandip immikkoortortaani pitsaassusilerisoq aamma tuniaasut marluk, Svendstrupimi niuerfissanik inerisaasoq Lene Ladegaard aamma tunisassianik immikkoortukkaalerinermi ingerlatsisoq Niels Wann ilagalugit nunatsinni tunisassiorneq -immikullu Nutaaq-Codimik tunisassiorneq pillugu paasisassarsiorlutik tikeraarput.

- Kalaallit Nunaat tikillugu misigisaavoq nuannersoq. Tuniniaasutut sulininni pisisartut apeqqutigisartagaat siulleq tassaasarpoq Kalaallit Nunaaniissimanersunga aamma tunisassap tuniniakkama tunisassiarineqarnerani takunikuuneriga, taamaattumik maanna Kalaallit Nunaannut tikillunga tunisassiat tunisassiarineqartut takullugit pissusissamisoorpoq, ingammik tunisassiaq immikkuullarissoq Nutaaq Cod Maniitsumi tunisassiarineqartoq takugakku tuniniaasutut uppernassusera annertunerulerpoq, Marc Wobbe oqarpoq.

- Nutaaq Cod februarimi nersornaaserneqarpoq, taamaattumik ukioq manna Maniitsumi tunisassiarineqarnerani malinnaanissara pingaaruteqarpoq, Marc Wobbe oqarpoq.

Nutaaq Cod Tuluit Nunaanni

Marc Wobbe aamma Machesterimi Royal Greenlandip immikkoortortaani sulisut taamatullu Svenstrupimi sulisut ataasinngormat marlunngormallu Sisimiuni Royal Greenlandip tunisassiorfiani raajanik saattuassanik saarullinnillu tunisassiorneq paasisassarsiorfigereeramikku pinasunngornermi Nuummi ilaatigut Royal Greenlandip nunatsinni tuniniaavianut paasisassarsiorlutik pulaarput. Tikeraat pingasunngornermiit tallimanngornerup tungaanut Maniitsumiipput.

- Tamatta assigiinngitsunik aalluussaqarluta paasisassrsiorluta angalavugut, taammaattorli Nutaaq Codip tunisassiarineqarnera malinnaavigisallugu tamatsinnut pingaruteqarpoq, paasisariaqaratsigumi tunisassiaq taanna immikkooruteqarluinnartuusoq. Tunisassiap tunisassiarineqarnera nammineq isitsinnik takullugu tunisassiarineqartarneralu pillugu tuniniaavigisatsinnut oqaluttuarisinnaalernera tamatsinnut iluaqutaasussaavoq, Royal Greenlandimi niuerfissanik inerisaasoq Lene Ladegaard oqarpoq.

Manchesterimi Royal Greenlandip immoorrtortaani tuniniaasut aamma ilisimasanik katersippput.

- Tuniniaanermut immikkoortortarput Manchesterimiittoq Tuluit Nunaanni neriniartarfiutilissuarmut saarullinnik tunisassianik Nutaaq Codinik annertuunik tunisaqaqqammerpoq. Taamaammat neriniartarfiutilissuaq Nutaaq Codinik tunisassioriaatsit kiisalu tunisassiat allat Royal Greenlandimeersut pillugit ilisimasaqarlualernissaa pingaaruteqarpoq, Niels Wann Jensen oqarpoq.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image