- Snowboardernermi unammisssutini Big Airimi aamma Slopestylemi pikkorinnerpaanngorusukkama snowboardertartut pitsaanerpaat akornanni toqqagaanera nuannaarutigisorujussuaara, Jonas Strømsted oqarpoq.

Snowbaordertartut pitsaanerpaat akornanni toqqagaanermigut Jonas Strømsted ilaatigut snowboarderluni sungiusaqatigiinneranni Frankrigimi illoqarfimmi Tignesimi juulip 20-aniit 27-ianut ingerlanneqartussami peqataassaaq. Sungiusaqatigiinneq Freestyle Kraftcenterimit aaqqissuuneqarpoq. Freestyle Kraftcenter Danmarkimi sisorartartut klubbit arlaqartut Danmarks skiforbund suleqatigalugu pilersinneqaqqammerpoq.

-Snowbaordertartut pitsaanerpaat akornanni toqqagaaninni timersuummi ingerlatanni ineriartornissannut periarfissat ammaanneqarput, timersullammak qilanaaqisoq oqarpoq.

Qaffasissunik angusaqarnissaq anguniarneqarpoq

Freestyle ski, Skier Cross aamma Snowboardimik timersuutit ataatsimoortinniarlugit Freestyle Kraftcenter 2017-imi februarimi pilersinneqarpoq. Freestyle Kraftcenterip pilersinneqarneratigut timersuutini pineqartuni aallussinikkut qaffasissumik angusaqarfiunissaat anguniarneqarpoq.

Jonas Strømstedip snowboardimik unammisartut pitsaanerpaat akornanni toqqagaanini pillugu majimi paasitinneqarpoq. Pitsaanerpaat akornanni toqqagaanermigut unammisarnertigut aaqqissuussinerit sorlerpiaat 2018-ip naanissaata tungaanut akuuffigiumaarnerai piffissami aggersumi Jonas Strømstedip ilisimatinneqassaaq.

- Sapinngisannguara tamaat pitsaasumik angusaqarniarsariumaarpunga snowboardernermi unammissutini Big Airimi aamma Slopestylemi pikkorinnerpaanngornissara anguniagarivara, timersullammak aasaq manna sungiusaqataanissaminut qilanaaqisoq oqarpoq.

- Frankrigimi Tignesimi sungiusaqatigiinnermi peqataanissara nuannerunarteqaara. Snowboardertartut piginnaaneqarluartut ilinniarfigilluarsinnaasakka naapissallugit aamma inuit nutaat timersuummi ingerlataminni pikkorilluinnartut naapissallugit naatsorsuutigigakku sungiusaqatigiinnermi peqataanissara qilanaareqaara, Jonas Strømsted oqarpoq.

Saqqarmiorpassuarnik pissarsisarpoq

Jonas Strømsted aqqaneq marlunnik ukioqarlunili timersuummik snowbaordimik ingerlataqalerpoq. Kingorna unammersuaqataasarnermigut saqqarmiopassuarnik pissarsisarpoq ilaatigut nunatsinni unammersuarnerni, Arcitc Winter Gamesimi aammalu Danmarkimi Snowboardertartut unammersuartinneqarneranni peqataasarpoq. 2016-imi 2017-imilu Danmarkimi snowboardertartut Norgemi unammersuartinneqarneranni unammissutini Big Airimi, Halfpipemi aammalu Slopestylimi saqqarmiunik sølviusunik guldtiusunillu arlaqaqisunik pinnattarpoq.

- 2017-imi Danmarkimi snowboardertartut Norgemi unammersuarnissaannut peqataanera Royal Greenlandip tapiissuteqarneratigut piviusunngormat tapiissuteqarfigineqarnera qujamasuutigeqaara, Royal Greenlandimi tapiissimanngikkaluarpat unammersuarnerni peqataanera piviusunngorsinnaasimassanngikkaluarpoq, Jonas Strømsted oqarpoq.

Allattoq: Inga Egede, ineg@royalgreenland.com

Assit: Nammineq pigisat

Asseq

 
 

Royal Greenland aperiguk

i
Write the text from the image