- Nuugaatsiamut umiatsiartoqaqqusaanngimmat Royal Greenlandip Nuugaatsiami aalisakkanik tunitsiviutaa qanoq innarlersimatiginersoq suli paasinngilarput, Royal Greenlandimi tunisassialerinermi ingerlatsisoq Niels Ole Møller oqarpoq, nangipporlu:

- Politiit Nuugaatsiamut umiatsiarsinnaanermut akuersissuteqariarpata tunitsivik piaartumik alakkarneqassaaq.

Royal Greenlandip Ukkusissani, Saattuni Ikerasammilu tunitsivii kiisalu Uummannami tunisassiorfia ippassaq sisamanngornermi juunip 22-ani tunisiffigineqaqqissinnaanngorput. Uummannami nunaqarfiinilu pisimasut ilungersunartut pissutigalugit tunineqarsinnaasut annertussusaat killilersorneqarput, sulisulli suliartoqqittut amerliartornerat ilutigalugu tunineqarsinnaasut annertusiartortinneqarumaarput.

Niels Ole Møllerip ilanngullugu ilisimatitsissutigaa, Royal Greenland aalisartut aalisarnermut atortut tassaarsuaqarnerata malitsigisaanik annaasimasaasa annertussusaat pillugit paasissutissanik pissarsiuleruttortoq.

Malinnaaqqissaarpoq

Royal Greenlandimi attaveqarnermut sulisoqarnermullu pisortap Jens K. Lyberthip oqaatigaa, Uummannami nunaqarfiinilu pisut Royal Greenlandimit malinnaavigineqaqqissaartut.

- Aalisartut aalisarnermut atortut annaasimasaasa annertussusaat pillugit paasisaqarluariarutta Royal Greenlandip KNAPK aamma Qaasuitsup Kommunia suleqatigalugit aalajangissavaa qanoq iliortoqassanersoq. Aalisartut eqqugaasimasut sapinngisamik pitsaanerpaamik ikiornissaat kissaatigaarput taamatuttaaq aalisartunut sulisunullu iluaqutaasumik suliinnartoqarsinnaanissaata qulakkeerneqarnissaa pingaartipparput, Jens K. Lyberthip ilisimatitsissutigaa.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image