- Uummannap sulluani pingaartumillu Nuugaatsiami pisut ilungersunartut paasilluarpagut, tassami inuit maqaasineqartutut nalunaarutigineqartut Royal Greenlandimut sulisuinullu attuumassuteqarmata. Ilutigalugulu nunap sajoqqissinnaanera innuttaasunut suli aarlerisaarutigineqarpoq. Taamaammat aqutsisunit aalajangerneqarpoq Royal Greenlandip Uummannami pigisaanilu tunisassiorfiinut tunisineq unitsikkallarneqassasoq, Niels Ole Møller Uummannap pigisaani tunisassiornermi ingerlatsisoq oqarpoq.

Tunisassiorfinni Uummannami tunisassiorfik ilanngullugu tunisassiorneq unnuaq tassaarsuaqarnera pissutigalugu unitsinneqartariaqarsimavoq. Taamaammallu tunisassiat qimaannakkat pitsaassusaat tunisassiareqqinneqarsinnaanerilu siullertut nalilersorneqaqqaassapput.

- Uummannap pigisaani sulisuvut pisoq pillugu tupaqqapput unnuarlu sininneqaratik. Pisoq sulisuvullu ataqqillugit tulaassuineq tunisassiornerlu unitsikkallarparput. Taamaammat aalisartut qinnuigaavut pisimasunut ataqqinneqqullugit, qinnuigaavullu tunisassiorfinnut aqagu saaffiginneqqullugit, tulaassuinissamut pilersaarusiat tunisassioqqileqqinnissarlu ilisimatitsissutigineqassammat, Niels Ole Møller oqarpoq.

Tunisassiornermi ingerlatsisup Uummannami tunisassiorfimmi ingerlatsisoq aammalu Ukkusissani, Saattuni Ikerasammilu tunisassiorfinni aqutsisut suleqatigalugit pisunik nalilersuissapput, tamatumalu kingorna pisanik nutaanik qaqugu tulaassuisoqaqqissinnaanissaa aalajangiunneqassaaq.

- Sillimaniarnissamut aarlerisaaruteqartoqartillugu tunisassiorsinnaanngilagut. Arlerisaaruteqarnerlu qaangiuteriarpat pisut nalilersoqqissavagut iliuuseqarlutalu. Taamaattumik aalisartut qinnuigaavut aalisarnertik unitsissagaat pisanillu katersineq unitsillugu, tassami tunisisoqaqqissinnaalerpat nutaaginnarnik taamaallaat tunisisoqarsinnaassammat, Niels Ole Møller erseqqissaavoq.

Asseq

 
 

Royal Greenland aperiguk

i
Write the text from the image