Langerakimi tunisassiorfiup piumasaqaatinik naammassinninnermut naapertuinermullu nersornaammik sølviusumik taallugu Marks & Spencerimit tunineqarnera piujuartitsineq tunngavigalugu niuernermik ingerlatsineranut uppernarsaataavoq. Tassa imaappoq, tunisassiorfiup misissuiffigineqarnermini tutsuiginartutut nalilerneqarnera persuarsiutissarujussuuvoq.

- Tunisassiorfiit Marks & Spencerimut pilersuisuusut tamarmik nersornaammik sølviusumik taaneqartartumik 2020-utinnagu tunineqarsimanissaat minnerpaatut piumasaqaataavoq. Tassa Royal Greenlandip Langerakimi tunisassiorfiata nersornaaserneqariikatannera Royal Greenland Marks & Spencerimut pilersuisartuni nersornaaserneqarsimasut ikittuararsuusut ilagilerpaat, suliffeqarfissuarmi Royal Greenlandimi avatangiisilerinermi ingerlatsisoq Lisbeth Due Schönemann-Paul oqarpoq. Tamanna Langerakimi tunisassiorfiup M&S-imik siunissami suleqateqarluarnissaanut tunngaviulluarsinnaavoq.

Langerakimi Royal Greenlandip tunisassiorfiani ingerlatsisup Peter Korsbækip angusat tulluusimaarutigai.

- Taama angusaqarluarnerput minnerunngitsumillu M&S-ip pilersuisuni tamarmik nersornaammik pineqartumik tunineqarsimanissaannut ukioq killiliussaa sioqqullugu nersornaammik pineqartumik tassa ukiunik pingasunik sioqqutsilluta tunineqarnerput pillugu tunisassiorfik sinnerlugu usorsisimaarlungalu nuannaarpunga, Peter Korsbæk oqarpoq, nangipporlu:

- Aamma isumaqarpunga, ulluinnarni ingerlatsinerput aallussavullu pisisartut pilersuisuminnut kissaataannut naapertuuttut, ingammik tunisassiatsinnik niuertarfinni pigisamini nioqqutissanik pisisartorput M&S qaffasissunik piumasaqaateqarlunilu isumalluartartoq eqqarsaatigalugu, Langerakimi tunisassiorfimmi ingerlatsisoq Peter Korsbæk oqarpoq.

Misissuiffigineqarneq sivisuvoq

Marks & Spencerimit silver – validation tunngavigalugu misissuiffigineqarneq sivisuvoq, tassa tunisassiorfimmi aqutsisut Svenstrupimilu sulisut assigiinngitsunik atuuffillit misissuinerni oqarasuaatikkullu apersuinerni arlaleriarlutik peqataapput. Tassa imaappoq, misissuisut Marks & Spencerimeersut piujuartitsineq tunngavigalugu ineriartortitsilluni suleriutsit erseqqissarumallugit tunisassiorfimmi tunisassioriaatsit, sulinermi atukkat avatangiisilerinerlu pillugit apeqquteqartarput.

Silver – validationimi tunngaviit pisiortorfigisartakkat aamma paasisimasallit suliaqarfiusartut assigiinngitsut soorlu inuussutissanik poortuineq, niuernermik ingerlatsinermi ileqqorissaarneq kiisalu ileqqorissaarneq avatangiisinillu eriaginninnineq tunngavigalugit niuernermik, teknikkimik, kiffartuussinermik, inerisaanermik tunisassiornermillu pitsanngorsaaneq pillugu ilisimasaat najoqqutaralugit aalajangerneqarput.

Royal Greenlandip silver – validation tunngavigalugu misissuiffigineqarnini M&S-imit Tuluit Nunaannilu niuernermik aallussaqartunit ilisimaneqarnerulernissaanut nersorneqarnerulernissaanut iluaqutaassaaq, Lisbeth Due Schönemann-Paul oqarpoq.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image