Avataasiorluni qaleralinniarneq suliniaqatigiiffimmit Sustainable Fisheries Greenlandimit – Kalaallit Nunaanni suliffeqarfinnit aalisarnermik aalisakkanillu tunisassiornermik aallussaqartunit ilaasortaaffigineqartumit – qaammatini 14-ini misissueqqissaarfigineqareerluni MSC-tut ippassaq maajip 23-ani akuersissutigineqarpoq.

- Europami niuerfiit tunisassianik MSC-itut akuerisanik piumasaqarneruleraluttuinnamarta niuerfiillu allat qaleralinnik Kalaallit Nunaata imartaanersunik siunissami niueruteqartalernissaminnik kissaateqaleratarsinnaammata kilisaatit Kitaani avataasiorlutik qaleralinniartartut MCS-tut akuersissutigineqarnerat ajunngilluinnarpoq, Lisbeth Due Schönemann-Paul oqarpoq, nangipporlu:

- Kitaani avataasiorluni qaleralinniarnerup MSC-tut akuersissutigineqarnera tulluusimaarutigeqalugulu usorsisimaarutigeqaarput. MSC-tut akuersissutigineqarnerata kingunerisaanik qalerallit MSC-tut akuersissutigineqartut piumaneqaleraluttuinnarnerat ilutigalugu pisisartutta piumasaqaataat eqquutsissinnaanngorpavut.

Kitaani avataasiorluni qaleralinniarnermut akuersissutigineqartoq kilisaatinut sisamanut – tamatumani Royal Greenlandip kilisaataataanut Sisimiut-mut aamma Tuugaalik-mmut - atuuppoq.

MSC-tut akuersissutigineqartoq kingumut atuutilermat 2017-imiit qaleralittat tamarmik MSC-tut akuerisaapput. Royal Greenlandilli poortuutissaatai avataasiorluni qaleralittanik tunisassiorfinnut ukiap ingerlanerani tulaassuisoqaqqittalerpat MSC-p ilisarnaaqqutaanik tungujortumik/qaqortumik qalipaatiliusumik ilisarnaaqqusersorneqartalissapput.

Suleqatigiinneq

Kalaallit Nunaanni qaleralinniarnermik aallussallit tassa aalisartut, aalisakkanik tunisassiortartut soorlu Royal Greenland kiisalu Kalaallit Nunaanni oqartussaasut suliniaqatigiiffimmi Sustainable Fisheries Greenlandimi ilaasortaanermikkut suleqatigiinnerat avataasiorluni qaleralinniarnerup MSC-itut akuersissutigineqarneranik kinguneqarpoq.

Kitaata imartaani qaleraleqassuseq uumassusilerisunit misissorneqarmata taamatuttaaq aalisariaatsit aalisaatillu kiisalu tunisassiorfiit missorneqarmata avataasiorluni qaleralinniarnerup ingerlarnga suliffeqarfimmit akuersissuteqartartumit aamma arlaannaannulluunniit attuumassuteqanngitsumit piffissap sivisuup ingerlanerani misissueqqissaarfigineqarlunilu nalunaarsorneqarpoq.

Kitaani avataasiorluni qaleralinniarnerup MSC-tut akuersissutigineqarnera akuersissutigineqartuni nunarsuarmi siullerpaajummat nuannaarutissarujussuuvoq, Lisbeth Due Schönemann-Paul oqarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image