Siornatigut 2011-mi 12-imi 13-imilu Royal Greenland nipisat timaannik misileraalluni aamma tigooqqaavoq.

- Niuerneq eqqarsaatigalugu taamanikkut nipisat timaannik tunisineq imminut akilersinnaanngilaq, maannali nipisat timaasa aningaasarsiutaasinnaanerat neriuutigalutigu misileqqippugut, Royal Greenlandimi tunisassiornermi ingerlatsisoq Sten Sørensen oqarpoq, nangipporlu:

- Isumalluutaasinnaasut tamaasa atorluarusukkatsigit ukioq mannalu nipisat timaat Ruslandimut Kinamullu tunisinnaaneq periarfissaammat aningaasarsiutigisinnaanerlurtigik misileeqqippugut.

Tunisassiorfiit nipisat suaannik, timaannik aalisakkanillu allanik ataatsikkut tunisassiorsinnaanissamut periarfissaqartut, tassalu Narsami, Paamiuni, Qeqertarsuatsiaani, Nuummi, Maniitsumi Kangaatsiamilu Royal Greenlandip tunisassiorfii ukioq manna nipisat timaannik togooqqaallutik misiliipput.

Nipisat angissusaat aallaavigalugit immikkoortiterlugit 20-kiilukkaarlugit nipisat timaat blokinngorlugit qerititerneqarput.

Periarfissaq iluarisimaarpaat

Ukioq manna Nunatta Kujataani nipisanniarneq aprilip 10-iani aallartimmalli maannamut Narsami Royal Greenlandip tunisassiorfianut katillugit nipisat timaat tonsit sisamat suaallu 20 tonsit missingi tunineqareerput.

- Nipisat timaannik tunisisinnaanermik periarfissaq aalisartut ilaannaasa atorluarpaat, kisianni aalisartut nipisat suaannik timaannillu tunisisartut periarfissaq iluarisimaarpaat. Aalisartut Qaqortumeesut ilaasa periarfissaq aamma atorluarumallugu nipisat timaannik suaannillu mannga tunisiartortarput, Narsami Royal Greenlandip tunisassiorfiani ingerlatsisoq Niels Sakariassen oqarpoq.

Ukioq manna nunatsinni nipisanniarnerup aallartinneraniit maannamut nipisat timaat 9,5 tonsit missingi Narsami, Paamiuni Maniitsumilu Royal Greenlandip tunisassiorfiinut tunineqareerput.

2013-imi nipisat timaat Royal Greenlandip tunisassiorfiinut tunisaammata katillugit nipisat timaat 385 tonsingajalluinnaat tunineqarput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image