Tunisinerup tunisassiornerullu unitsikkallarneqartarnerannik kinguneqartumik Saattuni, Nuugaatsiami, Ukkusissani Ikerasammilu tunitsivinni qerisuusiviit marsip apriililluunniit ingerlanerani ulikkaartarnerat pissutigalugu matuneqarallartarsimasut nioqqutissanik naammasseriikkanik annertunerusunik Uummannami quersuarnut qerititsivutigisunut ukioq manna assartuisinnaasimapput. Taamaammat nunaqarfinni pineqartuni aalisartut tunitsivinnut suli tunisisinnaapput, tunisassiorfimmilu sulisut 60 -it missaat suliuarsinnarput.

- Nioqqutissanik naammasseriikkanik annertunerusunik Royal Greenlandip quersuinut qerititsiviutigisunut Uummannamiittunut upernaaq manna assartuisinnaanerput pissutigalugu aalisartut suli tunisisinnaapput tunisassiornerpullu ingerlatiinnarsinnaavarput. Quersuarni qerititsiviutigisuni uninngasuutigisinnaasavut amerlimmata ilimagaara tunisineq ukioq manna unitsinneqassanngitsoq, aamma tunisassiornerput sikuernissaata tungaanut ingerlatiinnarsinnaavarput, Royal Greenlandip Ikerasammi tunitsiviani aqutsisoq Elisabeth Filemonsen oqarpoq.

Suli ulikkaanngillat

Umiarsuit tikinnissaasa nunaqarfinnilu qerisuusiviit imaarneqarnissaasa tungaannut Saattuni Ukkusissanilu tunitsiviit qaleralinnik suli tunitsivigineqarsinnaallutillu tunisassiorsinnaapput.

- Nioqqutissanik naammasseriikkanik annertunerusunik assartuisinnaanngornerput pissutigalugu qerisuusiviit ukioq manna ulikkaanngillat. Taamatuttaaq aalisartut tunisisinnaanerannik killilersuinngilagut, aalisartulli tunisinissaannut pilersaarusiortarpugut. Qerisuusiviit suli ulikkaaqqajanngimmata sikuernissaata tungaanut tunitsivigineqarsinnaassasugut ilimagaara, Royal Greenlandip Ukkusissani tunitsiviani aqutsisoq Johanne Samuelsen oqarpoq.

Aamma Saattuni tunitsivik sikuernissaata tungaanut tunitsivigineqarsinnaallunilu tunisassiornerminik ingerlatsiinnassaaq.

- Nioqqutissanik naammasseriikkanik assartuisarsimanngikkaluarutta qerisuusivigut marsimi ulikkaareersimassagaluarput, qerisuusivigulli ukioq manna ulikkaanngillat. Palitsit nioqqutissanik naammasseriikkanik issoraavigineqarsimasut 300-t assartornikuugatsigit tunisineq unikkallanngilaq aamma tunitsiviusuarsinnarlutalu tunisassiortuarsinnarpugut, Saattuni tunitsivimmi aqutsisoq Marie Knudsen oqarpoq.

Taamatuttaaq Nuugaatsiami tunitsivimmi aqutsisoq Job Mikaelsen oqarpoq, Royal Greenlandip Uummannami tunisassiorfiata quersuini qerititsiviutigisuni uninngasuutigineqarsinnaasut amerlinerat malugusuutigigitsik.

- Siornatigut tunisineq apriilimi unikkallartarpoq, ukioq mannali maajimi suli ingerlanneqarpoq. Taamaattumik Uummannami uninngasuuteqartoqarsinnaanerulernera iluaqutigaarput, Nuugaatsiami tunitsivimmi aqutsisoq Job Mikaelsen oqarpoq, nangipporlu:

- Palitsit nioqqutissanik naammasseriikkanik issoraavigineqarsimasut 60-it missaat Uummannamut maannamut assartoreerpavut, sikuli ingerlavigineqarsinnaajunnaarmat assartuisinnaajunnaaratta qerisuusiviit aalisakkanik 200 tonsinik imaqarsinnaasut ulikkaangajalerput, ilimagaaralu tunisineq sapaatip-akunnera 21-mi unitsittariaqassagipput.

Nunaqarfinni aalisartut palitsit nioqqutissanik naammasseriikkanik tassa qaleralinnik issoraavigineqarsimasut 1000-nit amerlanerusut Saattuni, Nuugaatsiami, Ukkusissani Ikerasammilu tunitsivinniit qamuteralannik Royal Greenlandip Uummannami tunisassiorfiata – qaammatini qulingiluani nutarterneqarlunilu allilerneqareerluni ukioq manna marsip 28-ani ammaqqittup - quersuinut qerititsiviutigisunut februaarimiit apriilip qeqqata tungaanut assartorpaat. Palitsit 2200-t Royal Greenlandip Uummannami tunisassiorfiata quersuini qerititsiviutigisuni uninngasuutigineqarsinnaapput.

Nioqqutissanik naammasseriikkanik nunaqarfinniit assartuineq pillugu allaaserisat allat Royal Greenland pillugu aviisiliami atuarsinnaavatit: Uani:

Allattoq assiliisorlu: Inga Egede, ineg@royalgreenland.com

Asseq

 
 

Royal Greenland aperiguk

i
Write the text from the image