Ilulissani raajanik tunisassiorneq marsip qulingiluaani unitsinneqarpoq Qasiginanngunili aalisakkat tunineqartut annikimmata sapaatip akunneranut ulloq ataaseq marlulluunniit tunisassiortarput. Kangaatsiami saarullinnik tisaanik tunisassiorneq februarip 17-ianili unitsinneqarnikuugaluarluni maanna aallarteqqinniarneqarpoq.

Tulanngitsoorpoq

Royal Arctic Linep umiarsuaa raajanik tunisassassiassanik usisoq sikunera pissutigalugu marsip pingajuani Ilulissanut tulanngitsoormat Ilulissani Royal Greenlandip tunisassiorfia raajanik tunisassiorneq marsip qulingiluaani unitsinneqarpoq.

- Sikunera pissutigalugu raajat tunisassiarineqartussat tikiunneqanngitsoormata tunisassiassaarukkatta allatut ajornartumik tunisassiornerput unitsittariaqarsimavarput. Taamaattumik marsip qulingiluaani sulisut 50-it missingi angerlartiinnartariaqarsimavavut, Ilulissani Royal Greenlandip tuniassiorfiani ingerlatsisoq Jensigne Schmidt oqarpoq.

Royal Arctic Linep umiarsuaatai Ilulissanut tulassinnaanngorpata Ilulissani raajanik tunisassiorneq allaarteqqissaaq. Ilulissanili Royal Greenlandip tunisassiorfiani qaleralinnik immikoortiterillutik qerititeriterillutik sulisut sikumi aalisartut tulaassisarallartillugit suliassaqartuassapput.

Qalerallit Ilulissanut tulaanneqartartut nalinginnaasumik Qaasigiannguanut assartorneqartarluarput, kisiannili sikummat Ilulissani qerititerneqarput.

Annikitsunik tunisassiorput

Qasigiannguani sikunera pissutigalugu Royal Greenlandip tunisassiorfia marsip arfineq aappaanili aalisakkanik annikitsuinnarnik tunisassiorpoq.

- Sikunera aammalu tunisassiassat qerisut nungunneri pissutigalugu marsip arfineq aappaanili annikitsuinnarnik tunisassiorpugut. Sikumi aalisisartut tulaattagaasa annertussusiat aallaavigalugu sapaatip akunnerani ulloq ataaseq tunisassiornissarput siunniupparput. Taamalu tunisassiornitsigut sulisut 60-it sulisiorisinnaallugit naatsorsuutigaarput, Qasigiannguani Royal Greenlandip tunisassiorfiani ingerlatsisoq Hans Grønvold oqarpoq.

Sikunera pissutigalugu Kangaatsiami Royal Greenlandip tunisassiorfianut pisanik annikitsuinnarnik tulaassisoqartarmat februarip 17-iani saarulllinnik tisaanik tunisassiorneq unitsinneqarallarpoq tunisallu qerititiinnarneqarlutik.

- Aalisartut qassutinik aalisaqqilermata maanna saarullinnik tisaanik tunisassioqqilernissarput piareersarparput. Tunisat annertussusiat apeqqutaassaaq, kisianni sulisuvut 25-iusut piffisami aggersumi sulileqqinnissaat naatsorsuutigaara, Kangaatsiami Royal Greenlandip tunisassiorfiani ingerlatsisoq Abia Thorsteinsen oqarpoq.

Ilulissani Royal Greenlandip raajaleriffiani sulisut sulinngikkallarnerminni tunisassioriaatsinut tunngasut aamma eqqiaasarneq pillugit sapaatit akunnerini 12-imi 13-milu pikkorissartinneqassapput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image