65-inik ukiulik Ane Kathrine Christoffersen Royal Greenlandip Maniitsumi tunisassiorfiata errorsisarfiani sulisuusoq tunisassiorfimmi sulisutut 2016-imi juunip aallaqqaataani ukiut 40-nngortorsiorlugit nalliuttorsiorpoq. Taamaattumik Ane Kathrinep aalajaalluni tunisassiorfimmi ukiuni 40-ni sulisimanera ukioq manna februaarip 25-ani nalliussineqarpoq.

Ane Kathrine Christoffersenip ukiut 40-nngortorsiorlugit nalliuttorsiornera inuttaata kissaatigisaatulli suleqatikuisa, suleqataasa ilaquttaasalu peqataaffigisaannik Royal Greenlandip Maniitsumi tunisassiorfiata nerisarfiani nalliussineqarpoq, tamatumanilu nerisassaqarpoq, kaffeqarpoq, teeqarpoq kaagerpassuaqarlunilu kiisalu Maniitsumi erinarsoqatigiit "Inuusuit Nipaat" akunniliisuusarput.

- Ukiut 40-nngortorsiorlugit nalliuttorsiornera suleqatikkukka, suleqatikka ilaquttakkalu peqatigalugit nalliussigakku nuanneqaaq. Ulloq puigunaatsunngorpoq, Ane Kathrine oqarpoq.

Nuannaarpoq usorsisimaarlunilu

Ane Kathrine Christoffersen KGH-p aalisakkanik tunisassiorfiani 1976-imi sulilerami 25-innarnik ukioqarpoq. Tunisassiorfimmi ukiorpassuarni sulinermini paarlagaalluni suleqatigiiaat aqutsisuattut aamma unnukkorsiortutut unnuarsiortutullu ukiorpaalunni sulisimagaluarluni suliffini nuannaralugulu naammagisimaarnerarpaa.

- Qitornakka mikigallarmata unnukkut unnuakkullu qimattarnerat ilungersunartarpoq. Uimmali taamanikkut isumagilluartarmagit misigivunga ajoqutigisimanngikkaat, ullumikkummi sutigut tamatigut ingerlalluarmata, Ane Kathrine Christoffersen oqaluttuarpoq.

Ineriartorneq

Ane Kathrine Christoffersenip Kalaallit Nunaanni aalisakkanik raajanillu tunisassiornerup ineriartupiloornera ukiut ingerlaneranni malinnaavigaa. Inuttaata oqaatigaa, Maniitsumi Nutaaq Cod-inik tunisassiornermi saarullinnik uumasunik suliarinninneq immikkuullarissorujussuusoq.

- Aalisakkerinerup tungaatigut ineriartortitsinermi misigisama annerpaartaat tassaavoq tunisassiorfik aalisakkanik tunisassiorfimmiit raajanik tunisassiorfinngortinneqarmat. Taamanikkut takorloorsimanngisaannarpara angutit naligalugit tunisassiorfimmi nutaalianik maskiinalimmi suleqatigilerumaarlugit, Ane Kathrine oqarpoq, nangipporlu:

- Taamatuttaaq Royal Greenlandip Maniitsumi tunisassiorfiata saarullinnik uumasunik tunisassiorfinngortinngorlugu nutarterneqarnera tunisassiorfimmi allannguerujussuartoqarneranik kinguneqarpoq. Ilami saarullinnik uumasunik ullutsinni tunisassiortoqartalernera tupinnaqaaq. Taakkuninnga tunisassioqataasutut angumersinnginnera uggorilaarpara, pissangarunaqimmammi, Anne Kathrine Christoffersen Royal Greenlandip Maniitsumi tunisassiorfiani errorsisarfimmi sulisutut siunissami qaninnerusumi soraarnissaminik pilersaaruteqanngitsoq oqarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image