Isak Vahl aalisagartaminik Royal Greenlandip Narsami tunisassiorfianut sapaatip-akunnera kingullermi naggataamik tunisivoq. Isak Vahl ukiut 57-it ingerlaneranni Kongelige Grønlandske Handeliusimasumit tassa KGH-jusimasumit pigineqartuni umiarsuarni assartuutini kilisaammilu namminersortunit pigineqartumi inuttaareerluni namminersortutullu aalisartooreerluni naggataamik tunisivoq.

- Inuiaqatigiinnut tunniussaqarluarsimasutut misigisimallunga aalisartuunera unitsippara, Isak Vahl KNAPK-p siulersuisuini ukiuni 15-16-ini ilaasortaallunilu ukiuni marlunni siulittaasuusimasoq oqarpoq.

Pissutsit allanngorput

Isak Vahl Kalaallit Nunaata imartaata 1960-ikkunniit 1980-ikkut tungaannut saarulleqarluarleruttornerata nalaani KGH-mit pigineqartuni raajarniutini aalisakkanillu assartuutini inuttaasarsimasoq kingorna angajumi raajarniutaani inuttatut kingornalu namminersortutut aalisartuusimasoq saarullinniarnermiit raajarniarnermut 1980-ikkunni ikaarsaartoqarmat aamma peqataalluarsimavoq.

- Aalisartut ataasiakkaat - ingammik Kalaallit Nunaata sineriaata qanittuani aalisarnermik aallussaqartut - atugaat ukiut 57-it ingerlaneranni uangattaaq aalisarnermik aallussaqarfigisimasanni sorpassuartigut allanngorujussuarput. Silap pissusaata allanngornera aalisarnermilu killilersuinerit uagutsinnut aalisartunut annertuumik sunniuteqartumik pissutsit allanngornerannut tunngaviupput. Aalisakkat tonsikkuutaat siornatigut tunisarpavut, aalisakkanilli karsikkuutaanik ullutsinni tunisaqartalersimanerput naammagisimaartarparput, Isak Vahl KGH-mit pigineqartumi aalisariummi inuusuttuaraalluni 1960-imi inuttanngornermigut aalisarnermik aallusaqalersimasoq oqarpoq.

- KGH-ip raajarniutaani Rasmus Berthelsenimi 1960-imi inuttanngorama aalisarneq aallutilerpara. Tamatuma kingorna 1. gradimik angallammi naalakkatut allagartartaarpunga, taamatuttaaq KGH-mit pigineqartumi umiarsuarmi assartuummi Siumut-mi aamma kilisaammi namminersortunit pigineqartumi inuttaallungalu ukiut kingullerni amerlasuuni namminersortutut raajarniarneq saarullinniarnerlu aalluppakka, Isak Vahl oqarpoq nangipporlu:

- Ukiuni 57-ini ullut unnuallu ingerlaneranni nalunaaquttap-akunnerini amerlasoorpassuarni tamaviaarlunga sulisarpunga. Inuusuttuararsuullunga KGH-mit pigineqartumi umiarsuarmi aalisakkanik nunaqarfinniit tunisassiorfimmut Narsamiittumut assartuummi Siumumi inuit arlallit peqatigalugit inuttanngorpunga. Taamani sulipiluungaaratta KGH-p pisortaqarfianiit naveersippugut. Taamanimi qaammatini pingasuni ullut unnuallu ingerlaneranni nalunaaquttap-akunnerini amerlasuuni tamaviaarluta suligatta, Isak Vahl illalaarluni oqaluttuarpoq.

Maligassiuisut ilagaat

Isak Vahl Kujataani saarullinniarnermiit raajarniarnermut 1980-ikkunni ikaarsaartoqaleruttornerani kilisaammi namminersortunit pigineqartumi ukini arlaqartuni aquttooreerluni 1986-imi raajarniutitaarmat ikaarsaarnermi maligassiuisut ilagaat.

- Taamani killeqanngitsumik raajarniarsinnaatitaavugut. Kingornagut raajartassiisoqartalerlunilu aalisarsinnaanermut akuersissutit atuutilersinneqarput. Raajartassiisoqartalernerata aalisarsinnaanermullu akuersissutit atuutilersinneqarnerisa silallu pissusaata 1990-ikkunni allanngornerata kingunerisaannik sinerissap qanittuani raajarniarnerup ingerlarnga allanngorujussuarpoq. Tamatuma kingorna Kujataani raajarniarnerup ingerlarnga ajorsiartorpoq. Kujataani raajarniarnermi pissutsit allanngoraluartut Narsami aalisartut najukkaminnut tunisiartorsinnaanerannik kinguneqartumik Royal Greenlandip Narsami tunisassiorfia suli ammammat qujamasuutigaara, Isak Vahl oqarpoq.

Allattoq: Inga Egede, ineg@royalgreenland.com

Asseq: Niels Sakariassen, nammineq pigisaq

Asseq

 
 

Royal Greenland aperiguk

i
Write the text from the image