Uummannap tunisassiorfiani eqqiluisaarneq pillugu pikkorissaqataasoq Johanne Larsen oqarpoq Royal Greenlandip tunisassiorfiani tunisassiorfiup iluani eqqiluisaarnissaq eqqiluitsuunissarlu pingaarnerpaatut inissisimasoq:

- Kukikka qalipaateqaqqusaanngillat, tipigissarlunga suliartoqqusaanngilanga arlaannaanilluunniit tunisassiatsinnut ajoqusiisinnaasunik soorlu pinnersaatinik sulitilluta atoqqusaanngilagut, tassa tunisassiagut taama paarilluagaatigipput, Johanne Larsen oqarpoq.

Ilisimasassat

Uumannami tunisassiorfimmi sulisut eqqiluisaarnermik tunnngassuteqartunik septembarip ulluisa 14-anniit 19-iat ilanngullugu pikkorissartinneqarput.

Tunisassiorfimmi sulilersoq eqqiluisaarnermut tunngasunik paasissutissanik maleruagassanillu assigiinngitsunik ilisimasassanik ilisimatinneqartarpoq. Royal Greenlandimmi pingaartippaa qulakkiissallugu ilumut sulisup nutaap sulisutoqqallu maleruagassat sukumiisumik paasisimaneraat.

- Maani tunisassiorfimmi sulileqqaaramali paasinikuuara eqqiluisaarnissaq pingaartinneqartoq, pikkorissarnitsinnilu itinerusumik aatsaat paasivara sooq tunisassiat taamak peqqissaarunneqartigisumik suliarineqartarnissaat tassa tunisassiaq pitsaassutsimigut qaffasinnerpaamiitinniarneqartussaammat, Johanne Larsen oqarpoq.

Uummannami Royal Greenlandip tunisassiorfiani pitsaassusilerinermi aqutsisoq Louise Jensen aamma naqissusiivoq sulisut pinngitsooratik ilisimassagaat taaamatuttaaq ilisimatinneqartuaannartut tunisassiaq pitsaassutsimigut sapinngisamik qaffasinnerpaamik inissisimanissaanut.

- Sulisut namminneerlutik isumagisarpaat tunisassiorfitta eqqiluitsuunissaa, taakkuuppullu aamma tunisassiassanik suliaqartartut, tamaammat taakkununnga pingaaruteqarpoq tunisassiaq pitsaassuseqarluassappat qanoq sulinissaq ilisimalluassallugu, Louise Jensen oqarpoq.

Sineriammi Royal Greenlandip tunisassiorfiini pikkorissartitsisarnerit Narsami Inuussutissalerinermik Ilinniarfik Inuili suleqatigalugu ingerlanneqartarput. Pikkorissaanerit Upernavimmi, Qeqertarsuarmi, Kangaatsiami Nuummilu piffissami aggersumi aamma ingerlanneqassapput.

Royal Greenlandip sulisuinut pikkorissaasarnerit sumiiffinni assigiinngitsuni sulisut eqimattani agguataarlugit ingerlanneqartarput. Uummannami pikkorissaaneq ingerlanneqarmat sulisut 13-it pikkorissarnermi peqataapput.

Allattoq: Marie Kuitse Kristensen, mkri@royalgreenland.com

Asseq: Louise Jensen

Asseq

 
 

Royal Greenland aperiguk

i
Write the text from the image