- Imaanngilarli aalisartut qinnuteqaataat tamatigut akuerineqartartut, Royal Greenlandimi aalisarnermut siunnersorti Jan Kleinschmidt oqarpoq nangipporlu:

- Imaanngilaq aalisartoq kinaluunniit taarsigassarsinissaminut periarfissaqartoq. Aalisartoq Royal Greenlandimut taarsigassarsiniarluni qinnuteqartoq pisortanut akiitsoqassanngilaq, kiisalu taarsigassarsiarerusutami 25 procentiinik ileqqaagaqarsimassaaq. Tamatuma saniatigut aalisartup Royal Greenlandimut tulaassorsimasai kingumut ukioq ataaseq misissorneqassapput qanoq annertuginersut, taarsigassarsinissaminullu qinnuteqarneraniit qaammatit pingasut kingumut aamma qanoq ingerlasimanersoq misissuataarneqassaaq. Minnerunngitsumillu taarsigassarsiniaruni ukiup affaa qanoq tunisaqartiginissaminut naatsorsuuteqarnersoq.

Jan Kleinschmidt aamma oqarpoq, Royal Greenlandi pisortanut unammilleqqusaanngimmat aalisartut Royal Greenlandimut taarsigassarsiaqarnissaminnut qinnuteqannginnerminni pinngitsooratik aningaaserivimmut tassa bankimut qinnuteqaqqaartassasut. Aningaaserivimmiilli aatsaat itigartitaasimappata Royal Greenland aalisartunut aalisarluartunut taarsigassarsiaqartitsisinnaavoq.

- Aalisartoq Royal Greenlandimut taarsigassarsinissamut qinnuteqarluni saaffiginnippat Royal Greenlandip suliassatut siullerpaatut pisussaaffigaa aalisartoq aningaaserivimmut qinuteqaqqussallugu. Ilanngullugulu aalisartoq Royal Greenlandimiit aningaaserivimmut qinnuteqarnerani pappiliarsornikkut ikiorsinnaallugu, Royal Greenlandip Qeqertarsuup Tunuani aalisarnermut siunnersortaa Johannes Lindenhann oqarpoq.

Aalisartoq aningaaserivimmit aatsaat itigartinneqarsimaguni Royal Greenlandimut taarsigassarsiniarnermut qinnuteqarsinnaavoq. Aalisartoq taarsigassarsiniarluni qinnuteqaraangat Royal Greenlandimi akiitsut pillugit aalajangiisartoqatigiinnit ataatsimiissutigineqarlunilu misissorneqartarpoq, aalisartoq taarsigassarsiniarluni qinnuteqartoq taarsigassarsinissamut piumasaqaatinik ilumut naammassinninnersoq.

Aalisartorli taarsigassarsiniarnermut akuerisaasimappat aalisariutitaassami imaluunnit atortut pisiariniakkami akiisa 25 procentiinik nammineerluni ileqqaagaqarsimassaaq. Taarsigassarsitinneqaraangallu aalisartoq tunisinerit tamaasa pisami minnerpaamik 20 procentiinik naafferartumik akilersuisassasoq piumasaqaataasarpoq. Tamatuma saniatigut silarlunnera pissutigalugu aalisariarsinnaanngikkaangami naafferartumik akilersuinermik unitsitsigallarnissaminut periarfissaqarpoq, soorluttaaq napparsimalersimanini pissutigalugu naafferartumik akilersuinngikkallarsinnaatitaasoq.

Periarfissat allat

Royal Greenlandilli aalisartunut taarsigassarsititsisarnera assigiinngissinnaasarpoq, Nuummi Royal Greenlandimi aalisartunut siunnersorti Klaus Frederiksen oqarpoq:

- Assersuutigalugu kujataani aalisartut aalajangersimasut pingasut Royal Greenlandip umiatsiaararsiaanik attartortinneqarput. Taakku periarfissaqarput ukiup ataatsip qaangiunnerani aalisariut pigilerusukkunikku pisiarisinnaallugu, aamma isumaqarunik piumasaqaataasunik naammassinnissinnaanatik taava periarfissaqarput aalisariut Royal Greenlandimut uterteqqissinnaallugu, Klaus Frederiksen oqarpoq.

Taamatuttaaq avaannaani aalisartut 21-t umiatsiaarartaami akiata procentii tallimaannaat ileqqaagaralugit umiatsiaarartaarnissaminnut Royal Greenlandimit taarsigassarsitinneqarput. Nalinginnaasumik taarsigassarsiniarnermiit matumani atukkiinerup allaaqutaa tassaavoq; Royal Greenlandi avannaani aalisartut aalisarluartuusut umiatsiaaqqanik assigiinnik pisinissaannut taarsigassarsiaqartitsinissaminut 2016-imi 2017-imilu neqerooruteqarmat.

Royal Greenland aamma aalisartunut aalisarluartunut aalisariuteqareersunut aalisariummik anginerumaamik piserusuttunut ESU aamma aningaaseriviit suleqatigalugit taarsigassarsititsisarpoq.

Allattoq: Marie Kuitse Kristensen, mkri@royalgreenland.com

Asseq: Royal Greenland

Asseq

 
 

Royal Greenland aperiguk

i
Write the text from the image