- Umiarsuup tunitsiviup qerititsivia Aappilattumi tunitsiviup isaterneqareersup qerititsivianut sanilliullugu imaqqortuneruvoq. Taamaammat Aappilattumi aalisartut qalerallit 2017-imi septembarip qulingata tungaanut tunisaat siorna taamaalinerani tunisanit 450 tonsit missaanni annertunerupput, Upernavimmi tunisassialerinermi ingerlatsisuugallartoq Knud Mathiesen oqarpoq.

Royal Greenland tunitsivimmik umiarsualiivoq, taannalu Kampurimik ateqarpoq, Aappilattumilu aalisartut qaleralittatik tunitsivik Aappilattumiittoq juunimi isaterneqarmat umiarsuarmut tunitsivimmut tunisalerpaat. Qalerallit ullormut 15 tonsit umiarsuarmi tunitsivimmi Kampurimi qerinasuartinneqarsinnaapput, massa qalerallit tonsit pingasut-sisamat tunitsivimmi isaterneqareersumi qerinasuartinneqarsinnaasarsimasut.

- Taamaammat tunitsivimmik umiarsualiisoqarmat sulisut qulinik ilaneqarput. Sulisut katillugit 16-it umiarsuarmi tunitsivimmi juunimili sulipput, Knud Mathiesen oqarpoq.

Neriuuteqarneq

Aappilattumi tunitsivissaq piareeriarpat ukiortaami ammassangatinneqarpoq. Qalerallit tonsit ullormut pingasut-sisamat Aappilattumi tunitsivikup isaterneqareersup qerititsivianiitinneqarsinnaasarsimapput. Knud Mathiesen oqarpoq, Aappilattumi tunitsivissap qerititsivia tunitsivikup qerititsivianit imaqqortunerujussuusussaammat Aappilattumi aalisartut qalerallit ullormut 15 tonsit tunisinnaasarumaaraat.

- Tunitsivissaq ukiortaami piareeriarpat Aappilattumi aalisartut qalerallit ullormut 15 tonsit tunisinnaasassavaat. Taamaattumik ilimagaara, Royal Greenlandip Aappilattumi tunitsivissaa ukiortaami ammarpat tassunga tunineqartartut siunissami annertusiartortuarsinnarumaartut, Knud Mathiesen oqarpoq.

Royal Greenlandip Aappilattumi tunitsivissaa piareerpat Aappilattumi aalisartut qaleralittaminnik najukkaminni tunitsivimmut nutaamut ukioq naallugu tunisiartorsinnaasassapput.

Knud Mathiesenip ilisimatitsissutigaa, umiarsuarmi tunitsivimmi Kampurimi sulisut arfineq pingasut Tunuminngaanniit suliartortitaasuusut.

Allattoq: Inga Egede, ineg@royalgreenland.com

Asseq: Justine Petersen

Asseq

 
 

Royal Greenland aperiguk

i
Write the text from the image