- Tamatigut raajarniut tunisisussaq aallannginnermini maani allattaavitsinnut nalunaarsuiartortarpoq qaqugu tulaassiniarnerluni qanorlu annertutigusunik tulaassiniarnerluni nalunaarutigalugu. Taamaalilluta raajarniut tunisiniarluni tulalerpat maani tunitsivitsinni karsinik sikulersukkanik piareersimasuuteqartarpugut, Ilulissani Royal Greenlandimi tunitsivimmi sulisunut aqutsisoq Anders Berthelsen oqarpoq.

Tunisassiorfimmi tunisassiassat annertussusai apeqqutaallutik sulisut amerlassusaat ullormiit ullormut allanngorartarput. Tunisisartut tunitsivimmilu sulisut attaveqaqatigiinnerisigut aamma tunisassiorfimmi sulisut qanoq amerlatigisut suliartortinneqarnissat aalajangerneqartarpoq.

- Raajarniartut tulaassinissamut nalunaarsorsimasai naapertorlugit tunisassiorfimmi sulisussat inississorneqartarput. Assersuutigalugu kilisaateeraq Avataq sisamanngorpat tikuttussaavoq raajanik tunisiartorluni taassumali tunisassai aallaavigalugit sisamanngorpat tallimangorpallu sulisussat amerlassusissaat aalajangerneqassaaq, Anders Berthelsen oqarpoq.

Anders Berthelsen aamma oqarpoq raajarniut ulluni sisamani aalisarsartoq, aamma raajarniutit arfiniliusut ataatsikkut tulaassinnginnissaat nakkutigineqartartoq.

Isumalerujussuuvoq

Raajarniut Avatamik piginneqataasup Edvard Magnussenip Royal Greenlandimut attaveqartarnini aamma iluarisimaarpaa:

- Attaveqaqatigiilluartarnerput tamatsinnut isumalerujuuvoq, suliassatik qanoq annertiginersut ilisimasarpaat. Uagullu tunisisarnitta aalaakkaanerunissaanut attaveqarluarnikkut qulaajaasarpugut, raajarniummi Avatami piginneqataasoq Edvard Magnussen oqarpoq.

Iulissani Royal Greenlandip raajanik tunisassiorfiani sulisut ullumikkut 15-it missaaniipput, raajaqarluartilluguli ulapaarfimmi sulisut 25-it angusinnaasarpai.

Allattoq: Marie Kuitse Kristensen, mkri@royalgreenland.com

Foto: Jensigne Schmidt

Asseq

 
 

Royal Greenland aperiguk

i
Write the text from the image