Hans Albrecht Poulsenip Dronningip nersornaasiuttagaanik saqqarmiulerneqarnera nerisarfimmi Royal Greenlandip Maniitsumi tunisassiorfianiittumi ullumikkut pingasunngornermi septembarip arferngani nalliuttorsiutigineqarpoq.

- Aalajaallunga aalisartuunera pillugu Dronningip nersornaasiuttagaanik saqqarmiulerneqarnera tulluusimaarutigeqaara. Ulloq uannut ilaquttannullu nalliuttorsiorfiuvoq, Hans Albrecht Poulsen qitornani inersimasunngoreersimasut marluk, ernuttani ilaquttanilu allat peqatigalugit saqqarmiulerneqarnerminik nalliussisoq oqarpoq. Hans Albrecht Poulsenip inuttaaqatai nalliussinerani peqataaniassammata kilisaat Sisimiut Maniitsup umiarsualiviani tulaqqavoq.

Dronningip nersornaasiuttagaa sølviusoq inunnut pisortat suliffeqarfiutaanni ukiut 40-t sinnerlugit kipisuitsumik sulisimasunut tunniunneqartarpoq.

Suliffik ilungersunartoq

Hans Albrecht Poulsen ukioq manna 70-iliisussaq 1971-imi 24-nik ukioqarluni taamanikkut KGH-p kilisaataataani M/T Maniitsoq-mi - taamanikkut nutaarluinnaarsumi - inuttanngorami avataasiortunngorpoq. Hans Albrecht Poulsen aalisartutut maannamut ukiut 46-ssaat inuttaasoq kilisaatini assigiinngitsuni arlalinni ukiut ingerlaneranni inuttaasarsimasoq suli maannamut attuuttumik aalisartutut Royal Greenlandip kilisaataatani Sisimiut-ni ukiuni 21-ni kingullerni inuttaavoq.

Hans Albrecht Poulsenip oqaatigaa, 1971-imi saarulleqaleruttornerani aalisartunngorneraniilli aalisartutut sulinera suliatigut teknikkikkullu atortutigut allanngorsimasoq.

- Kilisaatini aalisartutut ukiorpassuarni inuttaalluni sulineq ilungersunartuaannartarsimavoq, naak sulinermi atukkavut teknikkikkullu atortuvut ukiut ingerlaneranni pitsanngoriartoraluartut. Kilisaatini aalisartutut inuttaasugut ukiorpassuit ingerlaneranni aalisagaqarluartillugu ilaatigut nalunaaquttap-akunneri 24-t angullugit sivisussusilimmik sulisarpugut. Kisianni ullup unnuallu ingerlanerani marloriarluta nalunaaquttap-akunnerini arfinilinni tassa katillugit nalunaaquttap-akunnerini aqqaneq-marlunni aalajangersimasumik sulisalernikuugatta pissutsit allanngornikuupput, Hans Albrecht Poulsen oqaluttuarpoq, nangipporlu:

- Aalisartutullu sulinitta oqinnerulerneranik kinguneqartumik aalisarnermi teknikkikkut atortut ukiut ingerlaneranni nutarterneqartarsimagaluartut aalisartutut sulineq ilungersunartuarsinnarpoq. Aalisartutulli sulinerup ilungersunartuunerata nuannequtigimmagu ukiorpassuarni aalisartuuvunga, Hans Albrecht Poulsen aalisartuujunnaarnissaminik suli pilersaanngitsoq oqarpoq.

- Arlaleriarlunga aalajangernikuugaluarpunga aalisartuujunnaassallunga, sulili piviusunngunngilaq – taamaattumik immaqa aappaagu aalisartuujunnaassaanga, Hans Albrecht Poulsen illalaarluni oqarpoq, nangipporlu:

- Suli inuttarerusussimagunaraminnga maannamut suli niusitaanngilanga.

Hans Albrecht Poulsen Dronningip nersornaasiuttagaanik nerisarfimmi Royal Greenlandip Maniitsumi tunisassiorfianiittumi nalliussineqartumik Royal Greenlandip kilisaataataani M/T Sisimiut-mi naalakkamit Pauli Olsenimit ullumikkut pingasunngornermi nal. 15:00 saqqarmiulerneqarpoq.

Allattoq: Inga Egede, ineg@royalgreenland.com

Assit: Esra Andersen Josephsen

Asseq

 
 

Royal Greenland aperiguk

i
Write the text from the image