- Qaleralittavut 501 tonsiusut piffissap sivikitsup ingerlanerani kilisappavut, Royal Greenlandimilu ukiut 30-t matuma siornali sulileramali piffissap sivikitsup ingerlanerani aatsaat taama annertutigisunik nalilinnik qaleralippugut, Royal Greenlandip kilisaataataani Sisimiut-ni naalagaq Ivan Olsen oqarpoq.

Kilisaat Sisimiut qaleralinnik 650-700 tonsinik useqarsinnaasoq tunisassiorfiutigivoq, qaleralittallu affai sinnerlugit niaquiarlugit paperuiarlugillu kilisaatip tunisassiorfiittaani nutaaliaalluinnartuusumi tunisassiarineqartarput, sinnerilu erlaviiariarlugit qerinasuarteriarlugillu kilisaatip usiani qerititsiviutigisumi - kilisaatip tunisassiorfittaata ataaniittumi - uninngasuutigineqartarput. Piffissallu sivikitsup ingerlanerani qaleralittat annertuut 501 tonsiusut Nuummi talittarfimmi maanna usingiarneqarput.

Aallarneq ulapaarfiusoq

Kilisaat Sisimiut qaleralittaminik usingiannginnermini nalinginnaasumik ullut 30 tungaannut sivisussusilimmik avataasiortarpoq, aallarnerli kingulleq sivikilluinnarpoq.

- Aap, piffissami taama sivikitsigisumi pisaqamaneq ulapaarfiusaqaaq. Taamaammat inuttat 30-usut aallarnermi kingullermi ullut 15-it missaanni sivisussuseqartumi ulapittorujussuupput, ulluni taakkunani ullut aqqqaneq-marluk qaleralinniarfiupput, Ivan Olsen oqarpoq nangipporlu:

- Massakkut aalisarnerup ingerlalluarnera qujamasuutigeqaarput. Ukiumi taamaalisukkut kilisalluni iluarpoq.

Kilisaat Sisimiut Tunup Kitaatalu imartaanni upernaakkut qaleralinniannginnermini saarullinnik, misaqqarnanik saarulliillu ilaannik sej-inik Barentsip imartaani ukiukkut kilisattarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image