- Paamiuni tunisassiorfimmi qalerallit erlaviiaannariarlugit qeritiinnarneqartaraluartut maanna qaleraleqarluarlernerata kingunerisaanik niaquiarlugit paperuiarlugillu tunisassiarineqartussanngorput, Paamiuni Royal Greenlandimi tunisassiorfimmi ingerlatsisoq Ilannguaq Abrahamsen oqarpoq.

Ilannguaq Abrahamsen aamma oqarpoq sulisut ilanngikkaluarlugit saarullilerisut ilaat qaleralinnik tunisassiulernermi sulisorineqassasut:

- Saarulliit tunineqartartut ikilinikuupput taamaammat ajoqutaanngitsumik saarullilerisarsimasut qaleralinnik niaquiaallutillu paperuiaasalissapput, Ilannguaq Abrahamsen oqarpoq.

Paamiuni Royal Greenlandip tunisassiorfianut qalerallit tunineqartut siorna 2016-imi katillugit 118 tonsiupput, ukioq mannali maannamut 128 tonsit tunineqareerput sulilu tuninisoqangaatsiarnissaa naatsorsuutigineqarluni.

- Qalerallit angissusaat qiviassagaanni angerujussuanngikkaluarput, kisianni kusanarlutillu amerliartornerat maani tunisassiorfitsinni malugaarput, taamaammat niaquiaalernissarput paperuiaalernissarpullu piareersimaffigilluinnarparput. Piffissami kingullermi silarlunnikuummat maanna silagisseriarmat sulilluta aallartinnissatsinnut qaleralinnik tulaassisussat utaqqiinnaarpagut, Ilannguaq Abrahamsen oqarpoq.

Paamiuni Royal Greenlandip tunisassiorfiani katillugit 100-t sulisorineqarput, taakku saarullinnik assagiarsunnik aamma qaleralinnik tunisassiortarput.

Allattoq: Marie Kuitse Kristensen, mkri@royalgreenland.com

Asseq: Ilannguaq Abrahamsen

Asseq

 
 

Royal Greenland aperiguk

i
Write the text from the image