Maniitsumi aalisartut saarulliit uumasut 4600 tonsit qaammatit marluk ingerlaneranni - tassa 2016-imi qaammatit tallimat ingerlaneranni tunineqartut annertoqataat - Royal Greenlandip Maniitsumi tunisassiorfianut tunisimavaat.

- Saarullinnik uumasunik tunisisinnaaneq ukioq manna aatsaat maajip 15-iani – tassa siornarnit qaammamik ataatsimik kingusinnerusumik - ammarneqarpoq. Taamaakkaluartoq siorna qaammatit tallimat ingerlaneranni angusatta annertoqataat ukioq manna qaammatit marluinnaat ingerlaneranni anguvagut. Taamaammat maannamut angusavut naammagisimaarluinnarpakka. Allaallumi Maniitsup eqqaani aalisarneq aggustimili ingerlanerliuleraluartoq angusaqarluarpugut, Royal Greenlandip Maniitsumi tunisassiorfiani ingerlatsisoq Susanne Marie Knudsen oqarpoq, nangippporlu:

- Aalisartut saarullinnik uumasunik tunisinissaminnut nalunaaruteqareersut piffissami kingullermi amerliartuinnarmata Nutaaq Cod-inik tunisassiornerput ukioq manna deembarip aallaqqaataata tungaanut ingerlassinnaassagipput neriuutigaara.

Atortut nutaat misilittagaqarnerulernerlu

Susanne Marie Knudsenip oqaatigaa, nutaanik atortoqalernertik kiisalu sulisut Nutaaq Cod-inik tunisassiornermut tunngatillugu ilikkagaqarnerulernerisigut misilittagaqarnerulernerat pissutigalugit Nutaaq Cod-inik ukioq manna tunisassiorneq pilertornerusumik ingerlanneqarsinnaasimasoq.

- Nutaaq Cod-inik tunisassiornermi teknikkikkut atortuvut pitsanngorsarneqarnikuupput. Ilaatigut aalisariut uumatitsivik saarullinnik uumasunik aalisartut qaassutaanniit tunisassiorfimmut assartuutaasartoq allanngortiterneqarpoq. Tamanna tunisassiassatta qaffasinnerusumik pitsaassuseqalernerannik kinguneqarpoq. Taamatuttaaq tunisassiorfik saarullinnut ilivitsunut qerinasuartitsivissuarnik pilerneqarpoq. Minnerunngitsumillu sulisut Nutaaq Cod-inik siorna tunisassiornermi ilikkakkatik tunngavigalugit misilittagaqarnerlernikuummata pilertornerusumik tunisassiorsinnaasimapput. Teknikkikkut atortunik pitsanngorsaanerit sulisullu ilikkagaqarnerulernitigut misilittagaqarnerulernerat pissutigalugit Nutaaq Cod-inik ukioq manna tunisassiorneq pilertornerusumik ingerlanneqarlunilu tunisassiat qaffasinnerusumik pitsaassuseqalerput, Susanne Marie Knudsen oqarpoq.

Isertitaqarluarneq

Susanne Marie Knudsenip oqaatigaa, Maniitsumi aalisartut saarullittaat aggustimili annikilliartoraluartut saarullinnik uumasunik tunisaqarnitigut – aamma ukioq manna - isertitaqarluartut.

- Saarullittat ukioq manna aggustimili annikilliartoraluartut Maniitsumi aalisartut qaammatialunni siullerni isertitaqarluarput. Aalisartullu tunisinissaminnut nalunaaruteqareersut piffissami kingullermi amerliartormata neriuutigaara saarulleqarluaqqilersimassasoq. Taamaattumik neriuppunga Nutaaq Cod-inik tunisassiornerput decembarip aallaqqaataata tungaanut ingerlassinnaassagipput, Susanne Marie Knudsen oqarpoq.

Royal Greenlandip Maniitsumi tunisassiorfiani sulisut tunisassiorfiullu allaffiani sulisut katillugit 210-220-t missaanniittut saarullinnik uumasunik 5000 tonsit missaaniittunik maajimi, junimi juulimilu tunisassiornermi suleqataapput. Saarulliit nerpii, saarulliit ilivitsut niaquikkat erlaviiakkallu kiisalu nutaggariit Nutaaq Cod-iliaralugit tunisassiarineqartarput.

Allattoq: Inga Egede, ineg@royalgreeenland.com

Assit: RG

Asseq

 
 

Royal Greenland aperiguk

i
Write the text from the image