- Jaaku Malik Qeqertarsuarmut juunimi tikiuteriitsiaannaripput teknikkikkut ajornartorsiuteqalerpgut. Taamaammat Upernaviup eqqaani aatsaat aggustip qeqqani qaleralinniaqqaariarluta saattuarniarpugut. Upernaviup eqqaani marloriarluta saattuarniarnitsinni saattuartavut 18-19 tonsit missaanniittut tunivagut, saattuartattalu annertussusaat naammagisimaaqaakka, aalisartoq 44-nik ukiulik aalisariutitaaminik amutsivimmi Fåborgimiittumi sananeqartumik nammineq aallertuusimasoq oqarpoq.

Angusaqarusussusilik

Jørgen Peter Jensenip aamma 42 fodsiusumik qisummik aalisariutaateqartup ukioq manna iluatsittumik anginerusumik aalisariutitaarnissani 2013-imi angunialersimavaa. Aalisariutitaava Jaaku Malik tapertariisitsilluni qaleralinniutaasinnaasoq, saarullinniutaasinnaasoq saattuarniutaasinnaasorlu meterit 14,95-itut takissussuseqarpoq, meterit 5,70-itut silissuseqarpoq saattuanillu tonsit qulingiluat missaanni kiisalu aalisakkanik tonsit 23-24-t missaanni annertussusilinnik useqarsinnaavoq.

- Nutaamik anginerusumillu aalisariutitaarnissara 2013-imili angunialerpara. Taamaammat aalisariummik pisinissannut Royal Greenland A/S-imit tapiissuteqarfigineqarnera pillugu iluanaartutut misigalungalu qujamasuppunga. Saattuarisartakkama aalisagartarisartakkamalu siornatigornit annertusinissaannut periarfissaqalerpunga. Allaallumi saattuat maannamut tuneriikkakka siorna tunisannit maloriaammik annertunerupput, Jørgen Peter Jensen oqarpoq.

Upernaviup eqqaani periarfissat

Jørgen Peter Jensen inuttaalu pingasut Jaaku Malik atorlugu Qeqertarsuarmiit tunisiffigisartakkaminniit sømilit 167-itut isorartussusilimmi ingerlaarlutik Upernaviup eqqaanut pingajussaanik saattuarniarfigisassaminnut sapaatip-akunnermi uani pingasunngormat apuupput.

- Sømilit 167-it missaannik isorartussusilimmi ingerlaarnitsigut Upernaviup eqqaani saattuarniarfissatsinnut apuuttarpugut, ingerlaarfigisartagarpullu isorartuvoq. Upernaviulli eqaani saattuarniarnermut periarfissaqarluarsorigakku sumiiffimmi tassani saattuarniartarpunga. Saattuartavut karsini sikulersukkani ullut arfinillit angullugit sivisussusilimmik uumatissinnaagatsigit Upernaviup eqqaanut marloriarluta saattuarniariartornivut ullunik arfinilinnik sivisussuseqarput. Qeqertarsuarmiit Upernavimmut utimullu nalunaaquttap-akunneri 34-it missaat atorlugit ingerlaartarpugut, aalisartoq ittanneq oqaluttuarpoq.

Jørgen Peter Jensen Upernaviup eqqaani silagitsillugu saattuarniartarusuppoq.

- Upernaviup eqqaani saattuarniarluartoqarsinnaaneranut isumalluarpunga – aamma siunissami. Neriuppungali Upernaviup eqqaani silarlulernera pissutigalugu ukioq manna saattuarniarsinnaajunnaarutta aqutsiveqarfinni Nuup Paamiullu eqqaanni saattuarniarnermut akuersissutinik tunineqarumaarlunga. Saattuarniarneq aallukusunnerugakku akuersissutinik tunineqassaguma aqutsiveqarfinni taakkunani saattuarniarneq oktobarimi ammarneqarpat saattuarniarusuppunga. Aqutsiveqarfinnili Qeqertarsuup Tunuani Upernavimmilu qaleralinniarnermut pisassiissutinik tunineqarnikuuvunga. Sumiiffinni kujasinnerusuni saattuarniarnermut akuersissutinik tunineqanngikkuma Qeqertarsuup Tunuani qaleralinniarnissannut periarfissaqarpunga, Jørgen Peter Jensen oqarpoq.

Aalisariut nutaaq saattuarniutaallunilu aalisagarniutaasoq Laila K Paamiuneersoq - Kangaatsiap eqqaani maannakkut saattuarniartoq - saattuartaminik Royal Greenlandip Qeqertarsuarmi tunisassiorfianut aamma tunisisarpoq.

Allattoq: Inga Egede. ineg@royalgreenland.com

Assit: Emil Mølgaard

Asseq

 
 

Royal Greenland aperiguk

i
Write the text from the image