Royal Greenlandimit sassaalliutigineqatussat tassaapput oquutaq saarullillu. Sassaalliutigineqartussat ullutsinni inooriaatsimut naleqquttumik nerisassiaralugit fastfood/streetfoodiliarineqassapput, tassa seadogiliaralugit aamma fish and chipsiliaralugit sassaalliutigineqassagamik.

- Seadogiliarineqartussaq tassaavoq oquutaq, taanna nerpiiariarlugu hotdogitut nerisassiarineqassaaq. Saarulliup nerpimernga tamussiussassanngorlugu, tassa nuggetsiliaralugu pommesfritesilerlugu sassaalliutigineqassaaq. Nerisassanik sukkasuumik iganeqarsinnaasunik sassaalliinermi siunertaavoq aalisakkat nunatsinni pissarititaasut atorluarlugit piffissap sivikitsup iluani iganeqarsinnaaneranik takutitsineq, Royal Greenlandimi tuniniaanermut ingerlatsisoq Malik Hegelund Olsen oqarpoq.

Royal Greenlandimi igasoq Sune Bjerre nerisassiussaaq isersimasunullu isiginnaartitsiutigaluni nerisassiussalluni, aalisakkat qanoq iganeqarsinnaanerinik inuit peqataasut ilinniarnissaminnik periarfissaqartikkumallugit.

Nerisassanik sassaalliinerup saniatigut Royal Greenland ilisaritinneqassaaq isiginnaagassiakkut taamatuttaaq suliffeqarfimmi ilinniagaqarsinnaanermut periarfissat saqqummiunneqassallutik.

Nerisassanik sassaalliinerni peqataasarnerup siunertaraa suliffeqarfiup Royal Greenlandip avammut nittarsaanneqarnissaa, inunnik amerlanerusunit ilisimaneqarnerulernissaa aammalu niuerusuttunut allanut aammaassinissaq.

Royal Greenlandimi sulisut tallimat nerisassanik sassaalliinermi, suliffeqarfiullu ilisaritinneqarnerani peqataassapput.

Nerisassanik sassaalliinerup ingerlanneqarnerani suliffeqarfiit allat aamma peqataajumaarput.

Nerisassanik sassaalliineq Foodfestival 2017 septembarip ulluisa 23-anni 24-anilu Nuup timersortarfiani Godhåbhallemi ingerlanneqassaaq. 23-ani nalunaaqutaq ullup qeqqaniit ualikkut sisamat tungaanut, 24-anilu ualikkut sisamaniit unnukkut arfineq-pingasut tungaanut alakkarneqarsinnaassaaq.

Allattoq: Marie Kuitse Kristensen, mkri@royalgreenland.com

Foto: John David Eriksen

Asseq

 
 

Royal Greenland aperiguk

i
Write the text from the image