Pinngortitap pissusaata aalisarneq ajornarsisikkaangagu aammalu tunisassiorfitta nutarternerat imaluunniit aserfallatsaalinerat pissutigalugu sivisunerusumik tunisassiorfiit matoqqasussanngoraangata sulisugut pikkorissut aalajaatsullu angerlartiinnarnagit piffissarli tunisassiorfiunngiffiusoq atorluarniarlugu specialarbejderuddannelsesimut aalisakkanik tunissassiornermut sammisumut sapinngisamik ingerlatinniartarpagut. Tamanna pisarpoq Maniitsumi Aalisakkanik Tunisassiornermik Ilinniarfik, ATI, qanimut suleqatigalugu. Sulisugut pikkorissut ilinniakkamik ukiut ingerlaneranni naammassinnissinnaanerat taamaasilluta qulakkeerinneqataaffigalutigu. Aaqqissuussinikkut tassuuna sulisut inuttut aammalu atuagarsornikkut piginnaasaat qaffarsarneqartarput.

Ilisimaaraarput anguniakkatta anguniarneranni aqutsisut pikkorissut pingaaruteqarluinnartut. Taamaammat aqutsisorisatta ataavartumik ineriartortuarnissaat qulakkeerniarlutigu aqutsisutut piginnaanerat ineriartortillugillu ataavartinniarlugit aqutsinerup tungaatigut ukiut tamaasa pikkorissartarpagut.

Taamatuttaaq sulisugut immikkuullarissumik piginnaanillit – talentit - ineriartornerminni aqqusaagassaannik immikkut ittumik aaqqissuussaassumik aaqqissuussiffigisarpagut – taamaalilluta suliffeqarfitsinni siunissami aqutsisutut

aammalu immikkut ilisimasalittut inissisimasussanik inerisaalluta.

Tamakku saniatigut pikkorissarnerit, suliamut ilinniartitaanerit il.il. allat suliamut inuillu ataasiakkaat piginnaanngorsaaqqinnerannut sammisut ingerlanneqartarput.

Pikkorissaanerit amerlasuut suliffeqarfitsinni sulisutsinnit ingerlanneqartarput, taamaalilluta pikkorissaanerit amerlanerpaat kalaallisut oqaatsit atorlugit ingerlanneqartarput, oqaatsimmi taakku sulisutta amerlanersaasa siullertut oqaaserivaat.

Royal Greenlandimi ilinniartitaaneq siunissamut aningaasaliinertut isigaarput:

Ilinniartitaaneq Royal Greenlandimi sulisunut tamanut pingaarutilerujussuuvoq, fabrikkimi sulisumiit allaffissornermik sulialinnut, immikkoortortaqarfiillu suliaqarfiillu akimorlugit suleqatigiinnut.

Piukkussanik ineriartortitsineq pillugu allataq uani aamma atuarsinnaavat Navigatio 20.

 
 

Royal Greenland aperiguk

i
Write the text from the image