Silagitsillugu grillerissatilluni nersussuup neqaa, puulukip neqaa pølsellu toqqarneqakkajuttarput. Kisianni aalisakkat aamma qaleruallit grilleruminarlutillu grillikkat mamarluinnartarput.

Aalisakkanik grillerineq

Aalisakkanik grillerinermi eqqqaamasassat amerlanngitsut eqqaamagaanni aalisakkat grilleruminartarput.

  • Grilli kissarlunilu ipiitsuussaaq. Grilli ipeqarpat aalisagaq sinnikuni nippussinnaavoq mamassusaalu sunnerneqarluni
  • Aalisagaq uuliamik annertunngitsumik taneriarlugu kusanartortaa ammut saatsillugu grillimut iliuk. Taamaalioruit qalappat grillikkatut isikkoqarluni kusanartumik sikannertaqassaaq.
  • Aalisakkat nerpii angisuut sivisunerusumik grilligassat kissarpallaanngitsumut ilineqartassapput, aalisakkallu nerpii mikisut kissarluartumut ilineqartassapput
  • Aalisakkap nerpia sapinngisamik ataasiaannarlutit mumissavat - aalisakkat nerisassiaralugit qajannartarmata
  • Aalisakkap nerpia ameerneqanngitsoq kissarluartumi nerisassiarineqarsinnaavoq
  • Aalisakkat orsoqarluartut soorlu kapisillit aamma tunfiskit grilleruminartarput
  • Orsoqarpallaamik/uuliaqarpallaamik mamarsaasernaveersaakkit. Kissarpallaartumi nerisassiarigaanni inneq naaralasinnaavoq. Aamma ulorianarlunilu aalisagaq aserorlunilu aalisagarsunnikkunnaarsinnaavoq

Raajanik qalipalinnik grillerineq

Taamatuttaaq raajat qalipallit grilligassaqqilluinnarput.

  • Raajat unaajusamut kapputeriarlugit imaluunniit niutsivimmulluunniit ileriarlugit grillimi siakkit
  • Raajat qalipallit aassikkat grillimi kissartumi minutsialuinnarni sianneqassapput
  • Raajat qalipallit qanorluunniit - mamarsaaserlugit, pujoorlugit, unaajusanut kappullugit niutsivimmulluunniit ileriarlugit - nerisassiarineqarsinnaapput... sianneqarunik sallaatsumillu siakkunik naammappoq

Illinnartunik grillerinermut siunnersuutit

  • Qalerallit saarulliillu amiikkat naatitanik nutaanik, punnermik hvidvinimillu akoriarlugit grillerinermut niutsissummut ilillugit (sølvpapiramilluunniit poorlugit) nerisassiarineqarsinnaapput. Mamarluinnassapput!
  • Raajanik qalipalinnik pujooralutit misiliguk! Niutsivik sølvpapiaraluunniit pujoorissutinik pilattornerlukunik immeriarlugu pujulioqqullugu grillimut kissartumut iliuk. Raajanik qalipalinnik minutsialunni pujooreriarlutit sassaalliutigisinnaanngussavatit. Pujoorinerit iluatsillugu pujuukkanik naatsiialerlugit sassaalliutigisinnaavatit - mamarluinnartarput!
  • Soyamik, teriyakimik, sesaminik honningimillu mamarsaasilioriarlutit raajat qalipallit grillimut ilinnginnerini akulerutikkit
  • Nerisassiornermut akussanik mamarluinnartunik aamma aalisakkanut qalerualinnullu naleqqulluinnartunik aasakkut amigaateqarneq ajorpugut. Grillikkut nerisassiatit soorlu nutaanik naatsiialerlugit, mikisunnguanik naatitalerlugit, nutaanik salaatilerlugit mamarsaatissanillu naasulerluarlugit sassaalliutigisinnaavatit. Taamatuttaaq nutaarsunninneruleqqullugillu seernalaartuunissaat anguniarlugu citronip isseranik akukkit.
  • Grillerinerit iluatsillugu misilillugu soorlu iffiaq-qaqortumik focacciamik taaneqartartumik grillerillutit misiliguk. Aalisakkat imaluunniit qaleruallit soorlu avocadolikkanik salaatilerlugit sassaalliutigikkit.

Nerisassiornerit sivisussusaat

Quppersakkami matumani grillerinermut siunnersuutit arlaliupput aamma aalisakkat qaleruallillu nerisassiarinissaannut piffissat atorneqartussat allassimapput.

Quppersagaq takuuk.

Quppersagaq qallunaatut oqaatsit kisiisa atorlugit naqitaasoq pillugu paasisaqarnerorusukkuit uunga allassinnaavutit: www.royalgreenland.com

Asseq

 
 

Royal Greenland aperiguk

i
Write the text from the image