Aalisakkat qaleruallillu nerisassat allat akorerpianngisaannik omega-3-mik, D-vitamininik, jodimik aamma selenimik akoqarluarnertik pissutigalugu qaratsamut peqqinnarluinnartuunertik qangali ilisimaneqaatigaat. Ingammik orsut arrujasut omega-3-fedtsyret qaratsap ineriartorneranut sunniuteqarluartarmata timimut pingaaruteqarput (paasissutissanik pissarsiffik: altomkost.dk).

Raajat nalissaqanngitsut

Raajat atuarfimmut taquarineqarluarsinnaasut ilagaat. Raajammi proteineqarluarlutillu orsoqarpianngillat.

Inuussutissat proteineqarluartut soorlu aalisakkat qaleruallillu sivisuumik atasinnaasumik qaarsilaartitsilluartarput. Meeqqat atuarfimmi ilikkagagaqarluarnissaat qulakkeerumallugu qaarsilaarluarnissaat pingaaruteqarpoq. Taamatuttaaq proteini timitta ineriartorneranut pingaaruteqarluinnartut ilagaat, taamaattumik proteinimik akoqarluartunik nerisaqartarnissaq pingaaruteqarpoq (paasissutissanik pissarsiffik: sundhed.dk).

Mamarunartunik taqualiornissamut siunnersuutit

Raajat
Raajat assigiinngitsorpassuartigut taqualiarineqarsinnaapput. Niutsiveeqqamut immikkut poorneqarsinnaapput. Taava taquatit nerilerukkit qalipaajarlaatut isikkoqarlutillu mamaqassapput aamma nerisassannut allanut akugineqartariaannaassapput.

• Raajat assammik nerisariaannanngorlugit naatitanut amitsunngorlugit aggukanut ataatsimoortillugit meeqqanut nukarlernut taqualiarisinnaavatit

• Iffianik pisarnertut taqualianut taarsiullugit salaatinik, wrapsinik, pitanik sandwichinillu raajanik akulikkanik mamarunartunngorlugit allatuutissiaralugit meeqqanut angajullernut inersimasunullu taqualiorsinnaavutit

• Misiliguk peqqinnartunik pannakaalioriarlutit raajanik citronip isseranik, dildinik,taratsunik qasilitsunillu akusamik creme fraichelikkanik immerlugit. Kikkulluunniit pannaakaanik mamarisaqarput!

  • Manniit raajallu. Asuliinnaanngitsumik mamarineqarluarput! Iffiaq-qaqortoq sandwichiliassaq mayonnaisemik assigisaanilluunniit taneriarlugu naammattunik salaatileriarlugu tomatileriarlugulu mannilerlugulu raajaleruk. Imaluunniit iffiaq taneriarlugu manniit tomatillu saattunngorlugit aggukkat tulleriiaarlugit iffiamut iliorariarlugit raajanik qallikkit. Taqualiat mamarunarnerutikkumallugu nipisat suaannik qernertunik niutsiveeqqamut ikisanik ullup-qeqqasiorninni qaqissinnaasannik nassarsinnaavutit. Nipisat suaat mamarluinnartuupput, tarajornilaartuupput kusanartuullutillu
  • Taamatuttaaq avokado raajallu akulerunneqarluarsinnaapput. Tassami avocado orsoqarluartuusoq raajanut kimittuallaanngitsuusunut orsoqarpianngitsuusunullu akugissallugu naleqquppoq. Aamma citronip isseranik, dildinik, taratsunik qasilitsunillu akullugit ataatsikkut nerillugit nalissaqarneq ajorput
  • Salaatinut akussat mamarisatit tamaasa salaatiliareriarlugit raajanik dressingimillu mamartumik akukkit. Isumassarsitinneqarusukkuit salaatinik nerisassiornermut ilitsersuutit amerlasuut nerisassiornermut ilitsersuutinik saqqummiivigisartakkatsinniipput.

  
 

Oquuttat

Iffiat qallersuusikkat taqualiarissallugit ajornakusuulaarsinnaavoq, mamarinerpaasalli ajornaatsumik taqualiarineqarsinnaapput.

Assersuutigalugu oquutaq raspinik qallerlugu siataq remouladelerlugu karselilaarlugulu iffiamut qallersuutigiuk. Meeqqanit aamma inersimasunit mamarineqarluartuuvoq, namminerlu remouladeliamik brøndkarsenillu akullugu mamarnerulersinneqarsinnaavoq.

Kapisillit, saarulliit qalerallillu pujuukkat

Saarulliit, kapisillit qalerallillu pujuukkat taqualiani ingammik sandwichini, wrapsini, pitani qallersuutigalugit salaatinilu akugalugit aamma mamartarput. Periarfissat killeqanngillat, takorluuisinnaassuserli kisimi killiliisarpoq.

  • Sandwichilioraangavit sandwichiliassat aseqqorluttunit iffiukkat aamma qaamasut atortarsinnaavatit, aamma sikalaakkat sikalaakkaniunngiutsunit mamarinerunerlugit paasiniarlugu misiliisaqattaarsinnaavutit
  • Wrapsiliornermi aalisakkat pujuukkat nerillugit nakkakaatitsinannginnerusarmata, imujuminartarmata neriuminartarmatalu akussatut naleqqulluinnartarput. Wrapiliassat flødeostimik taneriarlugu pujuukkamik aalisagaleruk wrapillu imunnginnerani qeqqatigut salaatileruk, saattunngorlugit aggukkanik agurkileruk aamma bønnespireleruk

  

Asseq

 
 

Royal Greenland aperiguk

i
Write the text from the image