Royal Greenland Academy
Vi ønsker at tiltrække og fastholde kvalificerede medarbejdere gennem løbende og relevant kompetenceudvikling
Sulisut taakku piginnaanngorsarlugit ilinniarfiit neqeroorutaannik suliassaqarfinni pikkorissarnerisigut imaluunniit Royal Greenland Academy aqqutigalugu suliffeqarfimmi pikkorissaanikkut piginnaanngorsarlugit ataavartumik ineriartortinneqartarput.
Nalorninartut periarfissallu
Piginnaasat pimoorussinerlu ulluinnarni sulinermi aalajangiisuulluarput. Royal Greenland Academy ukiorpassuarni ingerlasimasoq sulisut akornanni piginnaanngorsaanermut suli pingaaruteqarpoq. Piginnaasakinneq aningaasaqarnikkut piginnaasatigullu suliffeqarfimmut nalorninartoqartitsisinnaavoq.
Royal Greenland Academy ukiorpassuarni ingerlasimasoq sulisut akornanni piginnaanngorsaanermut suli pingaaruteqarpoq. Akademi sulisunut tulluarsakkamik pikkorissaanikkut suliatigut inuttullu ineriartortitsinissamik periarfissiivoq.
Akademi qanoq ilinikkulluunniit aqutsisussanik pikkorissunik sulisoqarsinnaaniassammat sulisut ataasiakkaat suliffeqarfimmi sulilluarnissaannik kajumissaarniarlugit angusaqarluarniarlunilu ilinniakkanik ilinniaqqiffinnillu aamma neqerooruteqarpoq.
2022-mi iliuutsit inernerillu
Covid-19 pissutigalugu killilersuisoqareersorlu pikkorissaaneq 2022-mi aallarteqqinneqarpoq, pikkorissaanerillu arlallit ajunngeqisumik ingerlanneqarput. Sulisut 20 %-iisa, tassa sulisut 273-it Royal Greenland Academymi pikkorissarnissaat anguniarparput. Sulisut 245-t 2022-mi naammassinnipput, tassa anguniagarput angungajalluinnarparput.
SULISA+
Sulisa+ pikkorissaanerit katillugit sisamat 2022-mi nunatsinni ingerlanneqarput; marluk Sisimiuni Nuummilu Sulisa+ pikkorissarsimasunut malittareqqiinerupput, tunisassiorfiillu Upernavimmiittoq Ilulissaniittorlu siullermeertumik pikkorissaavigineqarput. Royal Greenlandip tunisassiorfiini annerni tamani Sulisa+ 2022-p naanerani ingerlanneqarsimalerpoq, suliffeqarfiullu taamaalilluni 2022-mi anguniakkani anguaa.
Sulisa+ ingerlanneqaraangat aqutsisut sulisullu inuttut ineriartornermik kingunerlutsitsisimanermullu katsorsarneqarnermik ukkatarinnilluni pikkorissarnermik ingerlataqartarput, kingornalu aqutsisut aqutsinermut tunisassiorfimmilu naleqartitanik anguniakkanillu aalajangersaaneq pillugu immikkut pikkorissarneqartarput. Sulisut aqutsisullu naggasiutigalugu ulluni marlussunni naleqartitanik aalajangersaanissamut katersuutsinneqartarput, tunisassiorfiillu ataasiakkaat naleqartitat suut naapertorlugit suliniarnerlutik aalajangersaasarput.
Royal Greenlandimi ilinniartunut bootcampertitsineq Nuummi ingerlanneqarpoq
Bootcampertitsineq tassaavoq Royal Greenlandip nunatsinni ilinniartuutaanik qanimut katersuutsitsineq, taamatuttaarlu kajumissuseqalernissamik, ataatsimoornermik attassiinnarnissamillu siunertaqartoq. Tamatuma saniatigut ilinniartut ilinniakkaminnik ingerlatsilluarumallutik suliatigut inuttullu sakkussaminnik pissarsisarput.
Ilinniartunut ilitsersuisut ukiut aappassaat katersuupput
Peqataasut ataasiakkaat ilinniartunut ilitsersuisutut akisussaaffeqarnermik piginnaasaqalernissaat kiisalu ilinniartunut ilitsersuisuinut quppersagassaq pillugu immersueqatigiinnissaq siunertaralugu ilinniartunut ilitsersuisunik pikkorissaasoqarpoq. Ilinniartunut ilitsersuisut aqqanillit nunatsinni sumiiffinniit assigiinngitsuneersut peqataapput. Ulluni pingasuni pikkorissartitsinermi ilinniartitaanermit immikkoortortamiit saqqummiisoqarlunilu, eqimattakkaarluni suliaqartoqarlunilu, ilinniartunut ilitsersuisuunermi unammillernartunik periarfissanillu eqqartuisoqarlunilu, oqallittoqarlunilu ataasiakkaat ilinniartumut akisussaaffiinut tunngatillugu siunissami eqqumaffigisassat sammineqarput.
2019-2022-mut anguniakkat piviusunngortitsinerillu
Anguniakkat:
- Tunisassiorfinni kilisaatinilu Sulisa+ naapertorlugu aqutsisunik pikkorissartitsinissamik ingerlatsineq
- Sulisut ukiumut 20%-iisa Royal Greenland Academymi pikkorissartinneqarnissaat
- Illoqarfinni minnerpaamik tallimani najukkani aalisartut Royal Greenlandimut pilersuisut pikkorissarnissaannik neqeroorfiginissaat
Anguniakkanik naammassinninneq:
Royal Greenland Academy Royal Greenlandimi sulisunut ilinniarfiuvoq. Ukiuni 20-nit amerlanerusuni ingerlanneqareerpoq, sulisorpassuillu pikkorissartinneqarsimalerput. Sulisa+ pikkorissaariaatsini nutaanerpaavoq, iluarisimaarneqaqaarlu. Pikkorissaariaaseq tunisassiorfinni arlalinni ingerlanneqartarpoq, pikkorissaanerlu siammartikkaluttuinnarneqarlunilu tunisassiorfiit allat pikkorissaanermik nutartikkamik neqeroorfigineqassapput.
Royal Greenland Academy Covid-19 pissutigalugu killilersuinernit eqqorneqarmat 2021-mi pikkorissaasoqarnikuunngilaq. Killilersuinerit pissutigalugit pikkorissaanerit arlallit pilersaarutaareersut naammassineqarsinnaasimanngillat, peqataasullu amerlassusaat pingajorarterutaanut annikillisinneqarpoq.
Najukkani aalisartut pikkorissartitsinitsinnut peqataanissaannut anguniagarput angunngilarput. Pilersaarusiornerli aallartereerpoq, 2023-llu ingerlanerani aallartinneqassasoq naatsorsuutigineqarpoq.
2030-mut angorusutat:
- Aqutsisunik pikkorissaaneq aalajangersimasumik aaqqissuussaassaaq
- Sulisut minnerpaamik ukiumut 20%-iisa Royal Greenland Academymi pikkorissartinneqarnissaat
- Najukkani aalisartut aalajangersimasumik Royal Greenland Academy aqqutigalugu pikkorissarnissaannut neqeroorfigisarnissaat
