MSC akuersissutitut toqqammavigalugu
Piujuaannartitsineq siunertaralugu aalisarnitsinnik ingerlatsineq Royal Greenlangimut pingaaruteqarluinnarpoq. MSC-p tutsuiginartumik akuersissuteqartartuunissaa suliami tassani pingaaruteqarpoq.
Aalisarneq attuumassuteqarnani pingajuusumit akuerineqanngikkaluarluni nungusaataanngitsumik ingerlanneqarsinnaavoq. Akuerisaaniarneq soqutigisaqartunut tamanut aningaasartuutaangaatsiarlunilu suliakkersuutaasarlunilu naggataagut pisiortorfiusartunut aalisartunullu aningaasartuutaasarpoq. Tamanna aalisarnermit akuerisaasumit kaaviiaartitat ioamerngi akuersisartumit akuersissummut akiliutitut atorneqarnissaannik peqquteqarpoq. Taamaammat pissuseqatigiiaanik aalajangersimasunik aalisartut tunisassiortullu niuerfiit piumasaqaleraangata akuerisartulluunniit tunniussinnaasaannik ingerlatsinermi sinaakkutissat pitsaanerusut pisariaqaleraangata aalisarnertik akuerisaatissallugu aatsaat toqqartarpaat.
MSC-tut akuerisaaneq ullutsinni nunani tamalaani piumaneqarluarpoq
Aalisarnernik akuersissuteqarniarluni sulineq, soorlu orpippassualerinermi (FSC) ilisimaneqareersutut, 1990-ikkunni pimoorullugu aallartinneqarpoq. Suliaqartut assigiinngitsut akuersissuteqarnissamut periusinik assigiinngitsunik neqerooruteqarput, ullumikkullu MSC toqqammavittut siuttuulluinnarlunilu pisisartunit akuerisaavoq. Annermik niuertarfinni pisisartut tunisassiaq nungusaataanngitsumik ingerlanneqarlunilu aalisarneqarsimaneranut uppernarsaataammat tunisassiat MSC-tut akerisaasut piumakkajunnerusarpaat. Pisiortortartut tunisassiortullu MSC-tut akuerisanik nioqqutaateqarunik taamaalillutik niuerfinni tunisaqarlualersinnaapput.
MSC-tut akuerisaanermi pingaartitatut tunngaviit
MSC-tut akuersissut pingaartitanik pingasunik tunngaveqarpoq; pissuseqatigiiaat pineqartut aalisarnerullu nalimmassarnissaat naammassisaqarfiunissaallu, aalisarnerup avatangiisinut sunniutai aalisakkanillu pisuussutit nunagisamit aqunneqarnissaat.
Aalisarneq akuerisaatinniarlugu suliaq annertuvoq piumasaqaatillu tamaasa naammassereersimagaluaraanniluunniit minnerpaamik ukioq ataaseq anguniarneqartarpoq. Aalisarnermilli ingerlatsinerup piumasaqaammut ataatsimut arlalinnulluunniit nalimmassaneqarnissa pisariaqakkajuppoq. Pingaartitat pingasut tunngavigalugit piumasaqaatit katillugit 28-upput piumasaqaallu sammisarluunniit anguneqassaguni minnerpaamik 80-inik pointeqartariaqarpoq. Aalisarneq piumasaqaatini tamani 80-it ataallugit 60-illi sinnerlugit pointeqarpat piumasat ukiut sisamat qaangiutsinnagit naammassineqartussat piumasaqaatigineqassapput. Aalisarneq MSC-tut akuerisaassappat pingaartitat pingasut tamarmik anguniagassartai 80-inik pointeqartariaqarput.
Royal Greenlandip akuersissutaata killiffia
Royal Greenlandip tunisassiassaataasa 56%-ii MSC-tut akuerisaasut 2019-imi naatsorsorneqarpoq. Pissuseqatigiiaat assigiinngitsut arlaliummata tunisassiat MSC-tut akuerisat arlaliupput, nammineq aalisarnitsinniit imaluunniit nunai tamalaani pisiatsinniit tunisassiagut.
Royal Greenlandip aallussatut aalisarnerit tamarmik MSC-tut akuerineqarnissaat pillugu nunatsinni aalisakkeriviit pisiortortartullu allat pingasut suleqatigai. Suleqatigiinneq kattuffimmi Sustainable Fisheries Greenlandimi ingerlanneqarpoq, maannamullu ataani takuneqarsinnaasut MSC-tut akuersissuteqarput:
Aalisarnermik pitsanngorsaanissamik suliniutit – FIP
MSC-tut akuersissummik pissarsissagaanni ingerlatsinermi allannguisoqartariaqartarpoq, soorlu aamma aalisarneq pillugu takussutissanik annertuunik katersisoqartariaqartoq. Siunnersuinerup nalimmassarneqartariaqarnera assersuutitut atorneqarsinnaavoq, imaluunniit saniatigut pisat qanoq amerlatiginersut aamma aalisarnerup qanoq immap naqqanik sunniinera misissuisoqartariaqartoq. Periuseq tamanna aaqqissuunniarlugu Fishery Improvement Projectimik, tassa aalisarnermik pitsanngorsaanermik suliniummik, suliniutinik tulleriaarilluni taamatuttaarlu aalisartut, ilisimatuut oqartussallu suleqatigalugit amigaatinik unammillernartunillu peqassagaluarpat suussusersiniarnermik suliaqartoqartarpoq.
Royal Greenland aalisarnermik pitsanngorsaaniarluni suliniutinut pingasunut ullumikkut peqataavoq. Suliniutit ukuupput:
- Newfoundlandimi peqqussuarniarneq
- Nunatta kitaata imartaani sinerissap qanittuani qaleralinniarneq
- Nunatta kitaata imartaani saattuarniarneq
Newfoundlandimi aalisarnermik pitsanngorsaaniarluni suliniut siullertut eqqaaneqartoq www.fisheryprogress.org iserfigalugu malinnaavigineqarsinnaavoq.
Nunatsinni suliniutit killiffii Sustainable Fisheries Greenland www.sfg.gl-imi nalunaarsorneqarput.
