Qalerallit sinerissap qanittuani aalisarneqarnerisa pitsanngorsarneqarnissaa pillugu suliniummiit (FIP) siunnersuutit
Nunatta kitaata imartaani sinerissap qanittuani qaleralinniarneq nunatsinni aningaasaqarnermut, suliffissaqarnermut kinaassutsimullu pingaaruteqarpoq.
Qaleralik peqqilluni nunatsinni inuiaqatigiinnut iluaqutaassaguni iluanaarutaanissaa, ataavartumik aalisarneqarnissaa aamma aalisakkat naammattumik amerlassuseqarlutik niuerfinni nunani tamalaaniittuni piumaneqarluarnissaasa qulakkerneqarnissaa pingaaruteqarluinnarpoq.
Maannamut aalisakkat mikisut tunineqartartut ajoraluartumik amerliartorlutillu ilisimatuussutsikkut pisassiissutissatut innersuussat annikilliartorput. Taamaammat aalisarnermi pingaarutilittut soqutigisaqartut aalisarnermik pitsanngorsaalluni suliniummik (FIP) 2018-imi aallartitsipput. Aalisarnerup nungusaataanngitsumik aqunneqarnissaa, qaleraleqassutsip peqqinnartumik inissisimanissaata attannissaanut taamatuttaarlu aalisartunut inuiaqatigiinnullu siunissaq ungasinnerusoq eqqarsaatigalugu aningaasaqarnikkut iluanaarutit annerpaaffissaaniitinnissaat tapersersorniarlugu ilisimasat pingaarutillit pissarsiarinissaat siunertaavoq
Suliniut ukiuni marlunni ingerlanneqarpoq, aalisarfinnilu Upernavimmi, Uummannami Qeqertarsuullu Tunuani aalisarfinni pingasuusuni sinerissap qanittuani aalisarnerup pitsanngorsarnissaa pillugu innersuussutinik saqqummiussinissaq pingaarnertut anguniagaammat 2021-ip aallartinnerani innersuussutit Aalisarnermut, Piniarnermut Nunalerinermullu Naalakkersuisoqarfimmut saqqummiunneqarput.
Innersuussutit sammisanut assigiinngitsunut immikkoortinneqarput, soorlu aalisarnermi anguniakkat, aqutsineq aamma sulinermi allannguutit. Aalisanerup aqunneqarnerani aalisarnermi aalajangersimasumik anguniagaqarnissaq tunngavigineqassaaq, aalisarnerullu nakkutigineqarnerani aalisakkat tunineqartut agguaqatigiisullugu angissusissaat malinneqassasoq innersuussutigineqarpoq. Innersuussutit allat qassutit nigartaasa minnerpaaffissaanut aalisaatillu annaasat piiarneqarnissaannut suleriusit pitsanngorsarneqarnissaannut tunngapput.
Aqutsisoqarfinni pingasuni atuutsitsilernissaq pillugu suliat soqutigisaqartunillu attaveqarnerit Aalisarnermut Naalakkersuisoqarfimmi suleqatigiissitanit ingerlanneqarput, tassanilu Royal Greenland peqataavoq, taamatuttaarlu suliniutinik nutaanik 2022-mi 2023-milu atuutsitsisoqalerpoq.
Aalisarfinni pingasuusuni atuutsitsilernissaq pillugu soqutigisaqartunik oqaloqateqarnissaq tulliutissaaq. Innersuussutit atuutsiilerneqarpata aalisarneq MSC-tut, tassa aalisarnerup akisussaassusilimmik nungusaataanngitsumillu ingerlanneqartup pisortatigoortumik nalunaaqutaanik tunineqarluni, akuerisaassasoq naatsorsuutigineqarpoq.
 siunnersuutit){kind=link}