Aalisarneq

Aalisarneq sinerissap qanittuani avataanilu ingerlanneqarpoq. Aalisarnerup sumi ingerlanneqarnissaa aalisarnermik inatsisitigut aalajangerneqartarpoq. Sinerissap qanittuani aalisartut pisatik nunami fabrikinut tunisarpaat. Avataasiortut umiarsuarminni nioqqutissiortarput, pisamilli minnerpaamik 25%-ii (raajat qalerallillu) nunniguttarpaat nunami fabrikini suliassanngorlugit.

Pisassiissutit

Pinngortitaleriffimmi biologit ukiumoortumik inassuteqartarput, Namminersortullu pisassiissutitigut aalisarnerup annertussusissa aalajangersortarpaat. Raajat, qalerallit assagiarsuillu aalisakkat pisassiissutaasartut ilamininnguaraat.

Nunat assigiinngitsut akornanni aalisarnermik isumaqatigiissutit  

Kalaallit Nunaat nunat assigiinngitsut akornanni aalisarnermik isumaqatigiissuteqarpoq. Aalisarnermik isumaqatigiissutit ilisimaneqarnersaraat Kalaallit Nunaata EU-llu akornanni isumaqatigiissut, tassuunakkut Kalaallit Nunaat Europami niuerfinnut tuniniaasinnaatitaalluni, Kalaallit Nunaatali eqqaani imartani aalajangersumik annertussusilinnik allanik aalisarsinnaatitsilluni.

Nunat assigiinngitsut akornanni aalisarnikkut attaveqarfiit

Danmarkip Naalagaaffeqatiginera aqqutigalugu Kalaallit Nunaat aalisarnermut tunngasutigut nunani assigiinngitsuni arlalinnik suleqateqarpoq. Tamakkua ilagaat NAFMC, NAFO, NEAFC, Nasco aamma ICES.