Timersullammaap OL-imut anngunniarnera tapersersorparput
Elite Sport Greenlandip Kalaallit Nunaanni timersortartut nunarsuarmi unammisarnerni peqataasalernissaat sulissutigileruttorpaa, nunatsinnilu timersullammannik ikinngitsunik maanna toqqaasimalereerpoq. Timersullammattut toqqakkat ilagaat Martin Møller 2014-imi OL-eqarnissaani peqataanissaminik neriuuteqartoq. Neriuuteqarnera Royal Greenlandimit tapersersorusupparput.
Timersullammattut toqqakkat pimoorussillutik sungiusartarmata toqqarneqartarput, taamalu pitsaasunik angusarissaarluarnissaminnut periarfissaqalersarlutik. Martin Møller ujakkaarnermi piginnaaneqarluartuusoq toqqakkat ilagaat. Angusarissaartarneri aviisini qulequtarineqallattaasarput. Siornatigut Norgemi Sverigemilu ungasissumut ujakkaartarnerni peqataasarsimavoq. 2010-mi Danmarkimi pissartanngorniunnerni peqataavoq Jonas Olsenilu ukioq taanna Vancoverimi OL-imi peqataasoq ajugaaffigalugu.
Martin Møllerip timersornerup silarsuaani piumassuseqarluinnartuunera tamanit tupaallaatigineqartarpoq, timersuutillu assigiinngitsut unammeqataaffigisani nersualaarneqaatigalugillu akissarsissutigisarpai. Ilaatigut 2012-imi Arctic Circle Raceqarnerani – nunarsuarmi ujakkaarnerit peqqarniinnersaattut taaneqartartumi 160 km-isut isorartutigisumi ajugaavoq.
Amerlasuut aamma Martip timimigut piginnaaneqarluarneranik tupaallatsinneqartarput. Ilaatigut arpannerit marluk ilungersunartut piffissap sivikitsuinnaap ingerlanerani akuuffigalugit ajugaaffigai, tassalu 2012-imi Nuuk Marathon 42,2 km-inik isorartutigisoq aammalu KangNu Running Race 2012, 35 km-inik isorartutigisoq. Ukioq taanna aamma sisoraatinik assakaasulinnik pisortatigoortuunngitsumik nunatsinni pissartanngorniunnermi sukkanerpaavoq.
Martin Møller Elite Sport Greenlandimit 2012-imi tapersersorneqalerpoq, OL-imi peqataanissamut anngunniunniarneranik siunertalimmik. Martin Møllerip timersornerup iluani piumassuseqarluarnera Royal Greenlandimit tupaallaatigisarparput, taamaammallu OL-imut anngunniarnerani Royal Greenlandimit nuannaarutigeqisatsinnik kaammattorusupparpu. Martip OL-imut anngunniarnera tapersersorusupparput.
