Avaleqqerineq kineserisut imaluunniit kalaallisut
Kinamiu tunisassiorfimmi sulisoq Royal Greenlandillu Japanimi tuniniaasarfianeersoq Qasigiannguit tunisassiorfiannut tikeraaqqammerput, siunertaavorlu avaleqqerinermi misilittakkanik paarlaasseqatigiinnissaq.
Royal Greenlandip pisisartumi piumasaannik malinninnissani ataqqisuuaa. Tamannarpiarlu pissutaaqataavoq tunisassiorfimmi sulisoq Kina-meersoq Zheng Mou Royal Greenlandillu Japanimi tuniniaasarfianeersoq Teruhisa Meguro sapaatip akunnerani kingullermi Qasigiannguit tunisassiorfiannut tikeraarnerannut.
Tikeraarnermi siunertaavoq qaleralinnik avaleraajaanermi misilitakkanik paarlaasseqatigiinnissaq, tassami Qasigiannguani Kinamilu tunisassiorfinni sulisut avaleqqanik tunisassioriaasii assigiinngillat. Kineserit qiuutit atortarpaat kalaallillu savik atortarlugu. Misilittaasorqarporlu periuseq sorleq pitsaanerunersoq.
- Kinamiut qiuutinik atueriaasiat uatsinnut arriinnarpallaarpoq. Kinamiut suleriaatsiminni peqqissaarussillaqqissorujussuupput, piffissaqarluarlutillu sulinissaminnut naammattunik sulisoqarput. Uagullu Kinamiu savimmik avaleqqereriaasitsinnik ilinniartipparput, suleqatigiinnitsinnilu paasivarput uagut pissuserput allanngortilaarlugu tunisassiamik pitsaanerusumik annertunerusumillu aammalu maani sulinitsinni sukkassutsitsinnut naleqquttumik pissarsisinnaalluta, tunisassiorfimmi ingerlatsisoq Ole Vestergaard naliliivoq.
Ilisimasanik paarlaasseqatigiinnermi inerniliineq malillugu Qasigiannguaniit qalerallit avaleraannik palle-mik ataatsimik 1000 kilonik oqimaassusilinnik Kinamut nassitsisoqassaaq, taqqavani tunisassiareqqinneqartussanik. Tamatuma kingorna nalilerneqassaaq tunisassiat pisisartut piumasaannut naapertuunnersut imaluunniit naamik.
Allattoq: kaha@royalgreenland.com
Assit: Inge Marie L. Rosing
Asseq
