Danmarkimi aalisakkanik niuernermi kaaviiaartitat Royal Greenlandip qaffatsippai
Misissuinerup takutippaa, Danmarkimi aalisakkanik nioqqutissiornerpaasuni 20-ni kaaviiaartitat ukiuni kingullerni marlunni ukiumoortumik naatsorsuuseriffiusuni 11 procentimik qaffariaateqarsimasut. Matumani pitsaasumik ineriartortoqarneranut atatillugu Royal Greenland pingaaruteqartutut inissisimavoq.
Danskit naalagaaffeqatigiiffianni aalisakkanik nioqqutissiornerpaajusartup, Royal Greenlandip, uissuumminartumik mumisitsinera naatsorsuutini maanna malunniuppoq.
Ukiumut naatsorsuutit inernerat ataatsimut isigalugu 519 mio. kr.-nik inerneqartumi 20 mio. kr.-nik qaffariaateqarsimasoq matumanilu qaffariaateqartoqarneranut Royal Greenlandimi pitsaasumik ineriartortoqarnera peqqutaanerpaasoq, danskit naalagaaffeqatigiiffianni aalisakkanik nioqqutissiornerpaajusartuni 20-usuni ukiuni kingullerni marlunni ukiumoortumik naatsorsuusiorfiusuni mississuisoqareernerata kingorna takuneqarsinnaanngorpoq. Royal Greenlandi naatsorsuusiornermut ilanngutinngikkaanni aalisakkanik nioqqutissiortartut sinneruttut 19-iusut ukiumut naatsorsuutit inernerannut pitsaanngitsumik sunniuteqarsimapput, tassami 100 mio. kr.-t sinnerlugit ajunaarutigisimammatigit, Berlingske Business allappoq.
Aviisip allataa naapertorlugu ataatsimut isigalugu aalisakkanik nioqqutissiortartut sinneqartooruteqarnissamik pilersitsinissartik ajornakusoortissimavaat. Suliffeqarfinnut pineqartunut 20-nut sinneqartoorutigineqartut annertussusaat procentinngoraanni 3 procentiinnaavoq. Ingerlatsinermut missingersuummi suliffeqarfiit pineqartut 20-t tamarmik ukiut marluk matuma siorna sinneqartooruteqarput, massa suliffeqarfiit sisamararterutaat 2011-mi amigartooruteqarsimallutik.
Nutaarsiassap pissarsiarineqarfia: Berlingske Business
Asseq
