Juullerpalaartitsinersuarmi sulisutsialak toqqarneqarpoq
Ilulissani tunisassiorfimmi sulisut ilaqutaallu 200-t missaanniittut juullerpalaartitsinersuarmi peqataammata Marius Wille ukiumi sulisutsialattut toqqarneqarpoq.
Kantina inikigineqarmat allaffiit marlussuit ilanngunneqartariaqalersimapput tunisassiorfimmi sulisut ilaqutaallu juullerpalaartumik arfininngormat decembarip 8-ni nal. 12.00-imiit 17.00-ip tungaanut kateritsinneqarmata, nerisassarpassuarnik tigooraaffigeriaannarnik sassaalliuteqarfiusumi.
- Tunisassiorfimmi aqutsisut aalajangerput ukioq manna nalinginnaasumik julefrokostertitsinani sulisut ilaqutaallu juullerpalaartitsinissamut qaaqquneqassasut taamaasillutik nuannisaqatigiissinnaaniassammata tunisassiorfimmillu takornariarlutik. Ilaqutariit eqimattat arlalikasiit tunisassiorfimmi takornariartinneqarput, ilaallumi siornatigut tunisassiorfimmik takunissimanngisaannartut paasivarput, tunisassiorfimmi ingerlatsisoq Hans Lars Olsen oqaluttuarpoq.
Raajaleriffimmi aqutsisoq Marius Wille sulisutsialammattut nal. 14.00 toqqarneqarpoq, uppernarsaammik sinilikkamik aammalu koorimik juullisunnitsunik imalimmik tunisilluni. Oqalugiarfigineqarami oqaatsinik nersorinninniutinik oqaaseqarfigineqarpoq, soorlu suliffimmut tunniusimasoq, suliartortuaannartoq inortuinerlu ajortoq, suugaluartunilluunniit suliaqarsinnaasoq, suleqatigiuminartoq, pisariaqartinneqarluni tunniusimasoq aammalu suliaminik aallussisoq.
Juullip inua aamma najuukkujoq mamartutugassanillu meeqqanut agguaalluni. Meeqqattaaq juullip inuanik assiliseqateqarnissaminnut periarfissinneqarput.
Sulisut tamarmik aamma juullimi qaarsillaataalluarumaartunik agguarneqartut, tunisassiorfimmi ingerlatsisoq oqaluttuarpoq.
Asseq
